Израиль улс Ираны цөмийн болон цэргийн байгууламжуудыг онилсон цохилт өгч, 78 хүний аминд хүрсэн. Эх сурвалжийн мэдээлснээр нас барагсдын дунд Ираны цөмийн хөтөлбөртэй холбоотой есөн эрдэмтэн, мэргэжилтэн байжээ. Мөн дор хаяж 320 хүн гэмтэж бэртсэн байна.

Үүний хариуд Иранаас Израилийн Иерусалим, Тель-Авив хотууд руу баллистик пуужин, нисгэгчгүй нисэх онгоцууд харвасан. Үүний улмаас гурван хүн нас барж, 70 гаруй хүн шархаджээ.

Израилийн Батлан хамгаалахын сайд Израиль Кац "Иран үргэлжлүүлэн пуужин харвасаар байвал Тегераныг үнсэн товорго болгоно" гэж мэдэгдэв.

Заналхийлэл үүгээр дуусаагүй. Израилийн ерөнхий сайд Беньямин Нетаньяху "Бид Иранаас ирж буй цөмийн болон баллистик пуужингуудын заналхийллийг таслан зогсоохыг зорьж байгаа. Энэ зорилгодоо хүрсэн. Тэдний 20 мянган пуужин үйлдвэрлэх хүчин чадлыг хүлээн зөвшөөрөх боломжгүй, тиймээс бид устгах арга хэмжээг авсан. Бид Тегеран руу замаа зассан. Ойрын ирээдүйд та бүхэн Израилийн онгоцууд, Израилийн Агаарын хүчин, манай нисгэгчдийг Тегераны тэнгэрт харах болно. Ираны дэглэмийн байгууламж, объект болгонд цохилт өгөх болно" гэжээ.

Харин Ираны тал АНУ, Их Британи, Францад хандан анхааруулга хүргүүллээ. Хэрвээ тэд Ираны цохилтод саад болох юм бол бүс нутаг дахь цэргийн байгууламжууд болон хөлөг онгоцуудад нь хохирол учруулна гэв.

Дашрамд дурдахад, АНУ, Ираны талууд өнөөдөр /2025.06.14/ Оманд цөмийн хөтөлбөрийн талаарх зургаа дахь удаагийн яриа хэлэлцээгээ хийх товтой. Гэвч бүс нутагт үүсээд буй хурцадмал байдал хэлэлцээг тодорхойгүй болгоод байна. Израилийн дайралтын дараа хэлэлцээ хийх нь үндэслэлгүй зүйл гэдгийг Ираны Гадаад хэргийн сайд Аббас Арагчи өчигдөр мэдэгдсэн билээ. Гэхдээ яриа хэлэлцээ цуцлагдсан гэсэн үгийг албан ёсоор хэлээгүй аж. Мөн "Израилийн дайралт нь АНУ-ын шууд дэмжлэгийн үр дүн" гэж тэр хэлсэн юм.