Хятад улс Ираны бүрэн эрх, аюулгүй байдал, нутаг дэвсгэрийн бүрэн бүтэн байдлыг Израиль зөрчиж байгааг буруутгаж, эрсдэлтэй бүх цэргийн үйл ажиллагааг даруй зогсоохыг уриалж байна. НҮБ дэх Хятадын элчин сайд Фу Конг Ойрхи Дорнодын асуудлаарх Аюулгүйн зөвлөлийн хурал дээр мэдэгдэхдээ, "Хятад улс зөрчилдөөнийг эрчимжүүлж, мөргөлдөөнийг өргөжүүлэхийг эсэргүүцэж, Израилийн үйл ажиллагаанаас үүдэн гарах үр дагаварт гүнээ санаа зовж байна" гэжээ.

Тэрбээр мөн Ираны цөмийн асуудлаарх дипломат хэлэлцээ үргэлжилж буй өнөө цагт Израилийн гаргаж буй үйлдэл нь сөргөөр нөлөөлнө гэдгийг онцлон тэмдэглэсэн байна.

Учир нь Израиль Баасан гаригийн (2025.06.13) үүрээр Ираны эсрэг томоохон хэмжээний цохилт өгсөн тухайгаа тайлбарлахдаа, энэ нь Тегераныг атомын зэвсэг бүтээхээс сэргийлэх урт хугацааны ажиллагааны эхлэл гэж мэдэгдсэн юм. Гэсэн хэдий ч эл өдрийн орой Иран хариу цохилт өгч, Иерусалим болон Тель-Авив хотод томоохон дэлбэрэлт болсон. Улмаар Хятад улс Ойрхи Дорнодын хоёр улсад байх иргэддээ аюулгүй байдлын сэрэмжлүүлэг өгсөн төдийгүй Израильд байгаа хүмүүсийг пуужин болон нисгэгчгүй онгоцны цохилтод бэлэн байхыг анхааруулав.