“Air India”-ын “Boeing 787-8 Dreamliner” онгоц Энэтхэгийн баруун хэсэгт, Ахмедабад хотын нисэх онгоцны буудлын ойролцоо осолдсон билээ. Тус онгоц Их Британийн Лондон хотын Гатвик нисэх онгоцны буудал руу орон нутгийн цагаар Пүрэв гаригийн /2025.06.12/ 13:38-д хөөрсөн боловч 190 метрийн өндөрт гараад дохио тасарчээ.

Онгоцонд 242 хүн байснаас 241 нь харамсалтайгаар амиа алдаж, Британийн нэг иргэн амьд үлдсэн байна. Амьд үлдсэн зорчигч Вишвашкумар Рамешийн хэлснээр хөөрснөөс хойш 30 секундын дараа чанга чимээ гарч, бүх зүйл маш хурдан болж өнгөрчээ. Тэрбээр онгоцноос яаж гарснаа огт санахгүй байгаа аж.

Зорчигчдын 169 нь энэтхэг, 53 нь британи, долоо нь португал, нэг нь канад хүн байсан.

Ослын шалтгааныг нарийн шалгалтаар тодруулах ч урьдчилсан байдлаар гурван таамаглал дэвшүүлээд байна. Эдгээр нь онгоцны хос хөдөлгүүр эвдэрсэн, шувууны дайралтад өртсөн, далавчны хаалт дэлгэгдээгүй байж магадгүй гэсэн таамаглалууд юм.

"Air India"-ийн эзэмшигч "Tata" групп ослоор амиа алдагсдын ар гэрийнхэнд тус тус нэг сая рупи буюу 86 мянган фунт стерлингтэй тэнцэх хэмжээний мөнгө өгнө гэж мэдэгджээ. 1868 онд үүсгэн байгуулагдсан "Tata" групп нь Энэтхэгийн хамгийн том үндэстэн дамнасан бизнес юм. Тус групп нь харилцаа холбоо, батлан хамгаалах, зочид буудал, цахим худалдаа зэргээр дэлхийн өнцөг булан бүрт үйл ажиллагаа явуулдаг конгломерат гэдгээрээ алдартай.

“Boeing 787-8 Dreamliner” моделийг 14 жилийн өмнө танилцуулжээ. Ердөө зургаахан долоо хоногийн өмнө "Boeing" компани "Dreamliner" онгоцны нэг тэрбум зорчигч тээвэрлэсэн түүхэн амжилтыг онцлон тэмдэглэж байв. Нийт 1175 "Dreamliner" онгоц 30 сая цаг зарцуулан таван сая орчим нислэг үйлджээ.

Ahmedabad: Debris of Air India Flight AI171 seen at the crash site, in Ahmedabad on Thursday, June 12, 2025. (Photo: IANS)