Сербийн ерөнхийлөгч Александр Вучич Лхагва гаригт (2025.06.11) Украинд гэнэтийн айлчлал хийж, Оросын түрэмгийллийн эсрэг тэмцэлд Европын дэмжлэгийг бэхжүүлэх дээд хэмжээний уулзалтад оролцжээ. Гэсэн хэдий ч түүнийг Орост найрсаг, ээлтэй ханддаг гэж ажиглагчид үздэгийн дагуу Вучич Москвагийн эсрэг хориг арга хэмжээг чангатгахыг уриалсан хамтарсан тунхагт гарын үсэг зурахаас татгалзсан байна. Энэхүү айлчлал нь Вучич 10 гаруй жилийн өмнө албан тушаалдаа орсноос хойш Украинд хийсэн анхны айлчлал нь юм.

Вучич Одесса хотод болсон Украин болон Зүүн өмнөд Европын 12 улсын хамтарсан дээд хэмжээний уулзалтад оролцжээ. Тэрбээр Сербийг Европын холбоонд элсүүлэх сонирхолтой байгаа гэж дээд хэмжээний уулзалтын үеэр мэдэгдсэн боловч Оростой ойр дотно харилцаатай гэдгээ мөн дурдсан байна. Дашрамд дурдахад, Вучич тавдугаар сарын 9-нд болсон Оросын Ялалтын баярт Европын холбооны сэрэмжлүүлгийг үл тоомсорлон байж оролцсон байдаг. Тухайн үед Москва Украин руу түрэмгийлж байхад Вучич ерөнхийлөгч Путинтэй мөр зэрэгцэн зогсох нь зохисгүй гэж Европын холбооны зүгээс үзэж байсан юм.

Вучич Лхагва гаригт Сербийн хэвлэлд өгсөн ярилцлагадаа Оросын эсрэг тунхаг бичигт гарын үсэг зурах нь тийм ч амар хялбар, энгийн зүйл биш гэж онцлон тэмдэглэсэн байна.

"Гэсэн хэдий ч Одессад онцгой зочломтгой хүлээн авсан ерөнхийлөгч Зеленскийд талархаж байгаа гэдгээ дахин хэлмээр байна" гэж тэрбээр хэлжээ. Хэдийгээр Серби нь Укрианы нутаг дэвсгэрийн бүрэн бүтэн байдлыг албан ёсоор дэмжиж байгаа ч Оросоос эрчим хүчний бараг бүхий л нөөцөө авдаг. Улмаар Украиныг бүхэлд нь эзлэн түрэмгийлсний дараа Оросын эсрэг тавьсан барууны хориг арга хэмжээнд Серби нэгдэхээс татгалзсан.

Түүнчлэн Вучичийн Украинд хийсэн айлчлалаас өмнө Орос улс Сербийг буруутгасан байна.

Тухайлбал, Балкан дахь эртний холбоотон Серби нь Украин руу зэвсэг экспортолж, ар нуруунаас хутгалж буйтай адил үйлдэл гаргасан гэж Кремль буруутгасан аж. Оросын Гадаад тагнуулын албаны мэдэгдсэнээр, Серби нь Чех, Польш, Болгар улсуудаар дамжуулж, зэвсэг экспортолсон. Гэсэн хэдий ч Серби энэхүү мэдэгдлийг няцааж, албан ёсны мөрдөн шалгалт явуулна гэж Орост хариу мэдэгдэл илгээсэн байна.