Иргэний зориг ногоон намын дарга Б.Батбаатараас цаг үеийн асуудлаар тодрууллаа. Иргэний зориг ногоон намд хамтарсан засаг орж ажиллах санал одоогоор тавиагүй байгаа ажээ. Тиймээс санал тавиагүй байхад урьдчилж хариулт хэлэх боломжгүй гэх байр суурийг илэрхийллээ. 

Иргэний зориг ногоон намын дарга Б.Батбаатар:

-Үндсэн хуулийн дагуу Ерөнхийлөгчтэй зөвшилцөж УИХ-д Ерөнхиий сайдыг томилуулахаар санал оруулж ирэх эрх бүхий ганц субъект бол МАН. Бусад нам эвслүүдийн хувьд Ерөнхий сайдыг томилуулахаар УИХ-ын чуулганд санал оруулах боломж байхгүй. Ерөнхий сайдыг томилох асуудлыг Төрийн байгуулалтын байнгын хороогоор хэлэлцэнэ. Харин манай намын хувьд байнгын хороо болон чуулганы хуралдаанд байр сууриа илэрхийлнэ. Аливаа эрх мэдлийг нэгээс нөгөөд шилжүүлэх үйл явц маш хурдан бөгөөд зөв шилжих ёстой. Энэ бол ардчилсан улсын зарчим.

Эрх мэдлээ шилжүүлэх үйл явц удаад ирэхээр эдийн засаг, улс төрийн нөхцөл байдал хүндрэх тал руугаа ордог.

Манай намд хамтарсан засагт орж ажиллах санал одоогоор ирээгүй байна. Эхлээд Ерөнхий сайд томилогдох ёстой. Үүний дараа Засгаа бүрдүүлнэ. Ингэснээр улс төрийн зорилго, бодлого, зарчим тодорхой болох байх. Тэгэхээр манай намд санал тавиагүй байхад тэгнэ, ингэнэ гэж урьдчилж хэлэх боломжгүй байна.