Уур амьсгалын өөрчлөлтийн эсрэг тэмцэгч, идэвхтэн Грета Тунберг тэргүүтэй сайн дурынхан Газын зурвасыг зорьж яваад Газар дундын тэнгист замдаа Израилийн цэргүүдэд саатуулагдсан билээ. Тэгвэл Грета Тунбергийг Мягмар гаригийн өглөө албадан буцаасан гэж Израиль мэдэгдэв. Грета Тунберг Тель-Авиваас Франц руу нисэх онгоцоор иржээ.

Парист газардсан хойноо Грета Тунберг "Израилийн цэргүүд намайг болон бусад идэвхтнийг олон улсын усанд хууль бусаар хулгайлсан" гэж буруутгав. Тэрбээр бусад идэвхтэнтэй салах ёс гүйцэтгэж чадаагүй бөгөөд тэдэнд санаа зовж байгаагаа илэрхийлжээ.

Түүнтэй хамт саатуулагдсан Францын зургаан иргэний тав нь албадан гаргах тушаалд гарын үсэг зурахаас татгалзсан. Тиймээс тэдний хэргийг одоо шүүхээр хянан шийдвэрлэх аж.

Израилийн арми Даваа гаригийн шөнө тусламжийн бараатай хөлөг онгоцыг Газын зурвасаас баруун тийш 185 км (115 миль) зайд олон улсын усанд саатуулсан. Улмаар Ашдод боомтод авчирч, зорчигчдыг нь Тель-Авивын Бен Гурионы нисэх онгоцны буудал руу шилжүүлсэн байна. Хөлөг онгоцонд Франц, Шведээс гадна Бразил, Герман, Нидерланд, Испани, Туркийн иргэд байжээ.