Орос, Украины хамгийн сүүлийн үеийн хоригдол солилцоо Даваа гаригт /2025.06.09/ боллоо. Энэ өдөр сураггүй алга болсон украин цэргүүдийн ар гэр Беларусийн хилийн ойролцоо хоригдол солилцоо болох цэгт цуглажээ. Олзлогдогсдоор дүүрсэн автобус ирж зогсох үед хүмүүс сураггүй болсон аав, ах дүү нарынхаа зургийг барин хүлээж байжээ. Тэдний ихэнх нь чимээ сураг сонсолгүй удсан учир итгэл найдвар багатай, айдас хүйдэстэй байсан юм. Энэ удаагийн солилцоогоор чухам хэдэн цэрэг солилцсоныг талууд хараахан мэдээлээгүй байна.

Истанбулын хэлэлцээний үеэр талууд өвчтэй, хүнд шархадсан, 25-аас доош насны цэргүүд болон 12 мянган цэргийн цогцсыг солилцохоор тохиролцсон. Энэ дагуу солилцоо ойрын өдрүүдэд хэд хэдэн үе шаттайгаар явагдана.

Солилцоонд хамрагдсан орос цэргүүд өмнө нь Беларусь улсад эмнэлэг болон сэтгэл зүйн тусламж авсан. Энэ удаад ч бас адил аж. Орост олзлогдсон украин цэргүүдийн зарим нь дайн эхэлснээс хойш олзонд байжээ. Тэд энэ хугацаанд Олон улсын улаан загалмайн нийгэмлэгийнхэнтэй ч уулзаагүй гэдгийг Украины цэргийн олзлогдогсдын асуудлыг зохицуулах штабын ажилтан Петр Яценко хэллээ.

Талууд өнгөрсөн сарын сүүлээр дайн эхэлснээс хойших хамгийн том хэмжээний хоригдол солилцоог хийсэн. Тодруулбал, энэ солилцоогоор талууд тус бүр 390 хоригдол солилцсон юм. Гэвч өнгөрсөн долоо хоногийн солилцоо будлиантай, маргаантай болсон билээ. Оросын тал 1000 гаруй цэргийн цогцсыг солилцох цэгт хүргэсэн боловч Украины албаныхан ирээгүй гэж Кремль буруутгажээ. Харин Украины тал Оросыг бохир тоглоом тоглож байна, тохиролцсон зарчмуудаа баримтлахгүй байна гэсэн юм.