Тодруулбал, Улаанбаатар хотын авто тээврийн хэрэгслийн албан татварын нэмэгдлийг цуцлах талаар гаргасан нийтийн өргөдөл 33 мянган иргэний санал авсан тул өргөдлийг судлан үзэж, санал, дүгнэлт гаргах үүрэг бүхий ажлын хэсэг байгуулагдсан. Улаанбаатарт авто тээврийн хэрэгслийн албан татвар, авто зам ашигласны төлбөрийг нийслэлийн ИТХ-ын 2024.12.04-ний тогтоолоор энэ оны нэгдүгээр сарын 1-нээс нэмсэн билээ.

УИХ-ын гишүүн Х.ГАНХУЯГ:

-Бид 2024 онд Хот тосгоны эрх зүйн байдлын тухай хуулийг батлахдаа авто тээврийн хэрэгсэлтэй холбоотой дээд, доод хязгаарыг тогтоож өгсөн байдаг. Татвар ногдуулах эрхийг нь тухайн орон нутагт нь олгосон. Үндсэндээ 2012 оноос хойш авто тээврийн хэрэгсэлтэй холбоотой татварыг шинэчилж чадаагүй. Гэтэл жил бүр зам тавих, засах шаардлага үүсдэг. Татвар нэмэхгүй байна гэдэг автобусаар зорчиж байгаа иргэнээс татвар авч автомашинтай иргэнд зам тавьж өгдөг нөхцөл байдал үүсээд байгаа юм. Энэ бол хэрэглээн дээр суурилсан л татварын нэг.

Автомашинтай хүмүүсээс татварыг нь аваад явж байгаа замыг нь л засч байгаа гэсэн үг.

УИХ-ын гишүүн Н.АЛТАНХУЯГ:

-Зам засахыг буруу гэж хэн ч яриагүй, хийдэг л ажил. Гэхдээ та нар 15 жил нэмээгүй татварыг гурав дахин өсгөнө гэдэг солиотой, галзуу зүйл яаж бодож олдог байна вэ, эрүүл хүмүүс мөн үү. Яагаад ийм амьдралгүй зүйл хийдэг юм бол. Энэ бол иргэдийн амьдралаас холдсон, тасарсны илрэл л гэж бодож байна. Сэтгэл, зүрх чинь нэг жаахан зөв, хүмүүсийн төлөө сэтгэлтэй байх хэрэгтэй. Тэгээд мега төслүүд гэж галзуу том тоо ярина. Мөнгөөр ажил явдаггүй юм, эхлээд сэтгэл, зүрхтэй байх хэрэгтэй. Залуу хүмүүс жаахан зарчимтай, ард иргэдийнхээ санаа, сэтгэлийг сонсдог баймаар юм. Зөвхөн хавь ойрынхноо л хараад байх юм. Хэсэгхэн хүн сайхан амьдарч байгаа, ард түмний амьдрал бол үнэхээр муудсан. Мөнгөтэй биш, сэтгэл зүрхтэй бай. Дахиж ийм зүйл битгий хийгээрэй.

Улаанбаатар хотын авто тээврийн хэрэгслийн албан татварын нэмэгдлийг цуцлах талаар гаргасан нийтийн өргөдлийг судлан үзэж, санал, дүгнэлт гаргах үүрэг бүхий ажлын хэсгийн санал, дүгнэлтийг хэлэлцлээд УИХ-ын Тамгын газраас тодруулж үргэлжлүүлэн хэлэлцэхээр шийдвэрлэлээ. Гишүүд татвар төлөх асуудлыг иргэдээс асуусан эсэх, нэмсэн татварыг хэрхэн зарцуулахыг асууж тодрууллаа.

Татвар нэмсэн асуудал зөв байсан бол 33 мянган иргэнээс гомдол гаргаж, Төсвийн байнгын хороо хэлэлцэхдээ хүрэхгүй байсан гэдгийг өнөөдрийн хуралдаанаар гишүүд онцолсон юм.

Нийслэлийн автозамын сүлжээг өргөтгөх, шинэчлэх зорилгоор автотээврийн болон өөрөө явагч хэрэгслийн албан татварын тухай хуульд заасан бүрэн эрхийн хүрээнд НИТХ-ын 2024 оны хоёрдугаар сарын 08-ны өдрийн 07 дугаар тогтоолоор нийслэл Улаанбаатар хотын автотээврийн албан татварын хувь хэмжээг хуульд заасан хязгаарт багтаан дөрвөн төрлийн автотээврийн хэрэгслийн жилд төлөх татварын хэмжээг 2010 оныхоос гурав дахин нэмсэн. Дээрх хууль, эрх зүйн зохицуулалтаас дүгнэн дараах санал, дүгнэлтийг Байнгын хороонд танилцуулав. Ажлын хэсгээс НИТХ-ын татвар нэмэгдүүлэх, хэм хэмжээ тогтоосон шийдвэр гаргахдаа тооцоо судалгаа дутуу, олон нийтийн санал асуулга авах асуудалд процессийн алдаа гаргасан байх магадлалтай тул нутгийн өөрөө удирдах байгууллага гаргасан шийдвэрээ эргэн харж, засаж сайжруулах, цаашид гадагшаа чиглэсэн хэм хэмжээ тогтоосон шийдвэр гаргахдаа иргэд, олон нийт, бүх талуудын оролцоог хангасан хэлэлцүүлгийг өргөн хүрээнд явуулж, гарсан үр дүнд тулгуурлан шийдвэрээ гаргах нь зүйтэй гэж дүгнэсэн байна. Түүнчлэн Монгол Улсын Их Хурлын тухай, Монгол Улсын Их Хурлын чуулганы хуралдааны дэгийн тухай хуульд заасан журмыг үндэслэн Төсвийн байнгын хорооны Засгийн газарт чиглэл өгөх тухай тогтоолын төслийг Засгийн газарт хүргүүлэх саналыг гаргасан байна.