АНУ-ын Цагаачлал болон гаалийн алба Баасан гаригт /2025.06.06/ Лос Анжелест 44 хүнийг баривчилсны дараа хот даяар эсэргүүцлийн жагсаал өрнөж эхэлсэн билээ. Жагсаал эхлээд тайван замаар өрнөж байсан ч цагдаа нар үймээн самуун дэгдээсэнтэй холбоотойгоор ширүүн сөргөлдөөн болон хувирчээ. Нөхцөл байдал хурцадсан тул ерөнхийлөгч Дональд Трамп Лос Анжелес хотод Үндэсний гвардийн 2000 цэрэг илгээх тухай санамж бичигт гарын үсэг зурж, эхний ээлжийн цэргүүд Ням гаригт ирсэн. Тэд Лос Анжелес даяар дараах гурван байршилд байрлажээ.

Мөн өнөөдрийн байдлаар 60 орчим жагсагчийг баривчлаад байна. Тэдний дунд насанд хүрээгүй хүүхдүүд ч бий.

Цагдаагийн газраас Лос Анжелес хотын төвийг хууль бус цугларалтын бүс гэж зарлаж, ойр орчмын хүмүүст мессеж сэрэмжлүүлэг илгээжээ.

Латин Америкийн нэгдсэн иргэдийн лигийн (LULAC) дэд ерөнхийлөгч Хосе Баррера хэлэхдээ "Цагаан ордон Лос Анжелес хотод иргэний үймээн самуун дэгдээхийг хүсч байна. Хотод 17 мянган цагдаа ажиллаж байхад Дональд Трамп Үндэсний гвардыг байршуулах шаардлагагүй байлаа. Цэрэг байршуулах нь хурцадмал байдал, сөргөлдөөнийг нэмэгдүүлж, аюултай жишиг тогтоож байна. Үймээн самуун их байгаа ч олон нийт харьцангуй эв нэгдэлтэй байна. Хотын ихэнх хэсэгт ажил бизнесүүд хэвийн үргэлжилж байна" гэв.

Цагаан ордны Хууль сахиулах, зайлуулах үйл ажиллагаа хариуцсан гүйцэтгэх захирал Том Хоман буюу олны нэрлэж заншсанаар "Трампийн хилийн хаан" Ням гаригт мэдэгдэл хийхдээ "Эсэргүүцлийн жагсаалаас үл хамааран цагаачдын баривчилгаа үргэлжлэх болно. Офицеруудын ажилд саад болсон хүмүүс баривчлагдах магадлалтай. Хууль сахиулах байгууллагыг ажил явуулахад саад болох нь гэмт хэрэг" гэжээ.

Харин Калифорни мужийн амбан захирагч Гэвин Ньюсом "Намайг үг хэлсний төлөө баривчилна гэж Трампийн хилийн хаан заналхийлж байна. Ирээд баривчлаач дээ, чанга эр минь. Би тоохгүй. Энэ чинь намайг Калифорнийн төлөө зогсоход саад болохгүй" гэжээ.