Герман улс Оросын түрэмгийллээс урьдчилан сэргийлэх ажлын хүрээнд хуучирч муудсан хоргодох байруудаа засч шинэчлэхээр төлөвлөж байна. Иргэний хамгаалал, гамшгаас аврах агентлагийн дарга Ральф Тислер "Дайн бол бидний бэлдээд байх нөхцөл байдал биш гэсэн ойлголт удаан хугацаанд түгээмэл байлаа. Гэвч энэ нь өөрчлөгдсөн. Европ тивд томоохон дайн дэгдэх эрсдэлд бид санаа зовж байна" гэжээ.

ОХУ ойрын дөрвөн жилийн дотор Европын улс руу довтолж магадгүй гэх айдас бий. Дөрвөн жил гэдэг нь Украин дахь цуст дайны дараа дахин зэвсэглэхэд хүрэлцэхүйц хугацаа гэж үзэж байна.

Германд газар доорх хоргодох байр 580 бий. Тэдгээрийн ихэнх нь ажилладаггүй. Энэ нь Хүйтэн дайны үед 2000 орчим байсантай харьцуулахад хамаагүй бага тоо юм. Германы хүн ам 86 сая орчим. Эндээс харвал Герман халдлагад өртлөө гэхэд нийт хүн амын таван хувь нь л хоргодох байранд багтана.

Хоргодох байр шинэчлэх ажлын хүрээнд туннель, метроны буудал, газар доорх гарааш, нийтийн эзэмшлийн барилгуудын подвалыг шинэчилж, улс даяар дуут дохио, мэдэгдлийн системийг өргөжүүлнэ.

Гэвч эдгээрийг хийхийн тулд маш их хөрөнгө мөнгө, багагүй цаг хугацаа шаардлагатай. Ирэх дөрвөн жилд хамгийн багадаа 10 тэрбум евро, дараагийн 10 жилд 30 тэрбум евро зарцуулах шаардлагатай гэж урьдчилсан байдлаар таамаглаад байна. Фридрих Мерц албан ёсоор канцлер болохоосоо өмнө Германы батлан ​​хамгаалахад зориулж хагас их наяд евро төсөвлөсөн. Үүний тодорхой хувийг Иргэний хамгаалал, гамшгаас аврах агентлаг зарцуулна. Гэвч үүний зэрэгцээгээр зэвсэгт хүчнийг шинэчлэх, цэргүүдийн сургалт, зэвсэг хэрэгсэл зэрэгт асар их мөнгө зарцуулах нь тодорхой юм.