ОХУ-ын хүчин дайн эхэлснээс хойш анх удаа Украины төв хэсгийн Днепропетровск муж руу анх удаа нэвтэрснээ Ням гаригт /2025.06.08/ мэдээллээ. Тус улсын Батлан хамгаалах яамны мэдээлснээр Оросын цэргийн 90-р танкийн дивизийн анги нэгтгэлүүд Днепропетровск, Донецк мужтай хил залгаа хүрч, улмаар Днепропетровскт нэвтэрсэн аж.

Истанбулын хэлэлцээний үеэр талууд тохиролцоонд хүрч чадаагүй учир ОХУ Днепропетровск руу довтлох ажиллагааг урагшлуулсан гэж Аюулгүйн зөвлөлийн дэд дарга Дмитрий Медведев мэдэгдсэн юм.

Гэвч Украин үүнийг үгүйсгэж байна. Украины Хортицын цэргийн хүчний хэвлэлийн төлөөлөгч Виктор Трехубов хэлэхдээ "Оросууд Днепропетровск муж руу Покровск, Новопавливка чиглэлээс нэвтэрсэн гэсэн худал мэдээллийг байнга тарааж байна. Гэхдээ энэ нь худлаа" гэжээ. Ням гаригийн өглөөний байдлаар Украин Покровскийн чиглэлд Оросын 65 довтолгоог зогсоосон аж.

Оросын арми сүүлийн долоо хоногт Сумы мужийн хойд хэсэг, Донецкийн Лайман орчимд ахиц дэвшил гаргаад буй. Дээрх мэдээлэл үнэн бол тулааны гол зангилаа болсон Покровскт ОХУ илт давуурхана гэсэн үг.

Украины "Deep State" шинжилгээний байгууллагын мэдээлснээр ОХУ Украины нутаг дэвсгэрийн тавны нэгээс бага хувийг эзлээд байна. Үүнд өмнө нь эзлэгдсэн байсан Крым болон зүүн Украины зарим хэсэг багтаж байна.

Дашрамд дурдахад, Днепропетровск нь Орост эзлэгдээд буй Донецк, Херсон, Запорожье мужуудтай хэсэгчлэн хиллэдэг. Мөн хүн ам сийрэг, хөдөө голлосон муж тул хамгаалахад амаргүй байж магадгүй юм. Уул уурхай, ложистикийн чухал төв гэгддэг тус муж дайнаас өмнө гурван сая хүн амтай байжээ.