Ерөнхий сайд асан Л.Оюун-Эрдэнийн хүүтэй холбоотой асуудал нийгэмд дуулиан тарьснаас хойш Монголын гүйцэтгэх засаглалын ажил тэг зогсоод бараг сар болж байна. Эдийн засгийн маш хүнд нөхцөлд улс орноо удирдах дараагийн Ерөнхий сайд хэн бэ гэдэг нь олон нийтийн анхаарлын төвд байгаа юм. Өнгөрсөн жилүүдэд МАН-ын наяад оныхонд хүрд эргүүлэх боломж олдсон бол энэ удаад 70 оныхон намын удирдлагыг гартаа авах бололтой.

Учир нь, шинэ Ерөнхий сайдад өрсөлдөж буй хүмүүсийн дийлэнх нь далаад оныхон, тэр тусмаа Ерөнхийлөгчийн Тамгын газрын дарга Г.Занданшатар дээр улстөрчид бооцоо тавьж байна. Г.Занданшатарын хувьд ҮХНӨ-ийг хийсэн гэх тодотголтой. Л.Оюун-Эрдэнийг бодоход аль ч намынхантай хэл амаа ололцож чадна. Нөгөө талаар боловсрол, мэдлэгийн хувьд Л.Оюун-Эрдэнийг дагуулахааргүй хүн юм. Түүний нэрийг Удирдах зөвлөлөөс Бага хурал руугаа оруулж байгаа бол заалнаас Г.Тэмүүлэн нэр дэвшинэ гэсэн мессеж ч МАН-ын цагаан байрнаас сэвэгдэж байна. Мөн Батлан хамгаалахын сайд С.Бямбацогт ч хүч үзэхээр санаархаж байсан. Ямар ч байсан МАН-д удирдлагын үе солигдож, далаад оныхны нуруун дээр улс орноо авч явах үүрэг ирж буй бололтой.

Г.Занданшатарыг Женко.Баттулгын хүн гэх хардлага Салхитын мөнгөний ордоос эхтэй. Гэхдээ үнэндээ Х.Баттулгын улиран сонгогдох хүслийг Г.Занданшатар ҮХНӨ-өөр нам дарсан. Л.Элдэв-Очиртой нийлж, Женко.Баттулгыг 2016 онд унагааж явсан нь бий.  Их эвслийн засаг байгуулагдахад нийцэж, базаж ажиллах туршлагатай, гадаад хамтын ажиллагаанд жин дарах тоглогч, дотоод улс төрөө ч даагаад, эв зүйгээ олоод явчих хашир бурхи гээд тал талаас нь авч үзэхэд Г.Занданшатарыг МАН-ын “төгс” нүүдэл гэж харж байгаа бололтой

МАН-ын Удирдах зөвлөл өнгөрөгч Баасан гаригт /2025.06.06/ хуралдаж, Ерөнхий сайдад нэр дэвшигчийг тодруулах Бага хурлаа товлон зарласан. Тодруулбал, тус намын Бага хурал өнөөдөр буюу зургадугаар сарын 9-ний өдрийн 11.00 цагаас болох юм.  Уг хурлаар Монгол Улсын Ерөнхий сайдад нэр дэвшигчийг тодруулна.

Дараагийн ерөнхий сайдыг Үндсэн хуулийн 43 дугаар зүйлийн 2 дахь хэсэг, 44 дүгээр зүйлийн 2 дахь хэсэгт заасны дагуу 30 хоногийн дотор томилох хуультай.

Өөрөөр хэлбэл ирэх долдугаар сарын 3-ны өдрөөс өмнө шинэ Ерөнхий сайдыг томилох ёстой. Хэрэв энэ хугацаанд томилж чадахгүй бол УИХ-ын тухай хуулийн 34.3.2, 34.3.3-т заасны дагуу Ерөнхийлөгч УИХ-ыг тараах шийдвэр гаргах юм.