Дональд Трамп, Элон Маск нар Пүрэв гаригаас хойш түнжин хагарсан билээ. Элон Маск ерөнхийлөгчийн татвар, зардлын хуулийн төслийг шүүмжилсэн тул компаниудынх нь засгийн газрын гэрээ эрсдэлд ороод буй.

Тэгвэл ОХУ технологийн тэрбумтан Элонд улс төрийн орогнол олгох боломжтой гэж мэдээллээ. Тодруулбал, Төрийн думын Олон улсын харилцааны хорооны нэгдүгээр орлогч дарга Дмитрий Новиков "Түүнд улс төрийн орогнол шаардлагатай бол ОХУ мэдээж санал болгох боломжтой. Гэхдээ Маск өөрөөр тоглоно гэдэгт итгэж байна. Түүнд улс төрийн орогнол хэрэг болохгүй байх" гэв.

Харин Кремлийн хэвлэлийн төлөөлөгч Дмитрий Песков "Энэ бол АНУ-ын дотоод асуудал, бид хөндлөнгөөс оролцох бодолгүй байна. АНУ-ын ерөнхийлөгч энэ нөхцөл байдлыг бие даан зохицуулна гэдэгт бид итгэлтэй байна" гэсэн мэдээлэл өгчээ.

ОХУ өмнө нь АНУ-ын мэдээлэгч Эдвард Сноуден болон Кремлийг дэмжигч Британийн блоггер Грэм Филлипс нарт орогнол олгосон удаатай.