Орос, Украины талууд Бямба гаригт олзны хүмүүсээ солилцохоор төлөвлөж байсан ч бүтэлгүйтжээ. Талууд бие биеэ буруутгасан байр суурьтай байна. Тодруулбал, сүүлийн мөчид солилцоогоо хойшлуулсан гэж ОХУ Украиныг буруутгасан бол Украин үүнийг Кремлийн бохир тоглоом гэж хэлсэн байна.

ОХУ-ын мэдэгдэлд "Украин олзлогдогсод болон нас барсан цэргүүдийн цогцсыг шилжүүлэх ажлыг гэнэт хойшлуулсан. 1200 гаруй цогцос солилцооны цэг дээр хөргөгчтэй ачааны машинд авах хүнгүй хүлээсэн" гэжээ.

Истанбул хотноо Даваа гаригт болсон энхийн хэлэлцээний үеэр талууд Бямба гаригийн солилцоог тохирсон билээ. Энэ солилцоог гурван жил үргэлжилсэн дайны хугацаанд болж байгаагүй том солилцоо болно гэж мэдэгдэж байв. Тодруулбал, "Оросын тал Украины амь үрэгдсэн 6000 гаруй алба хаагчид болон 25-аас доош насны хүнд шархадсан цэргүүдийн цогцсыг шилжүүлэх хүмүүнлэгийн ажиллагааг Истанбулын гэрээний дагуу эхлүүлсэн" гэж Оросын хэлэлцээчдийн ахлах Владимир Мединский мэдэгдсэн.

Тэдгээр 6000 цогцсын 1212 нь солилцооны цэгт гацсан бол үлдсэнийг нь авчирч яваа аж. Мөн шархадсан, хүнд өвчтэй, бага залуу 640 цэргийн жагсаалтыг Украинд гаргаж өгсөн гэв.

Харин Украин "Хүнд шархадсан болон залуу цэргүүдийг Бямба гаригт солилцохоор тохирсон. Цогцсуудыг эх оронд нь буцаах тов хараахан болоогүй" гэжээ. Тодруулбал, олзныхон болон цэргүүдийн цогцсыг солилцох нь тусдаа үйл явц гэж Украин мэдээлж байна. Украины Батлан ​​хамгаалах яам мэдэгдэл хийхдээ "ОХУ Истанбулд тохиролцсон зүйлээ мартаж, амьд хоригдлуудыг солилцоход саад болох зорилгоор зохиомлоор бэрхшээл үүсгэж, худал мэдэгдэл тарааж байна" гэв.