Ирэх 2026 онд АНУ, Канад, Мексикт болох хөлбөмбөгийн ДАШТ-д өрсөлдөх улс, орнуудын нэрс тодорч байна. Узбекистаны хөлбөмбөгийн шигшээ баг түүхэндээ анх удаагаа дэлхийн аваргад оролцох эрхээ авч, төв Азиас дэлхийн дэвжээнд гарсан анхны улс боллоо.

Тэд Абу Дабид АНЭУ-ын шигшээ багтай 0-0 гэсэн харьцаатай тэнцсэнээр хэсэгтээ хоёрдугаар байрт орж, ДАШТ-д шууд оролцох эрхээ авчээ. Тус тоглолтын дараа Узбекистан даяар баяр хөөрт умбаж, гудамж талбай баярлаж, цэнгэсэн хүмүүсээр дүүрчээ. Ерөнхийлөгч Шавкат Мирзиёев нь баг тамирчдадаа баяр хүргэн "Үндэсний спортын түүхэнд алтан үсгээр бичигдэх гайхалтай үйл явдал" гэж мэдэгдэн ард түмэндээ Курбан баярын бэлэг барилаа гэжээ.

Узбекистаны хөлбөмбөг сүүлийн жилүүдэд огцом сайжирч байгаа. Тэдний өсвөр, залуучуудын шигшээ баг тогтмол дэлхийн аваргад оролцож, өндөр амжилт үзүүлж ирсэн. Тэгвэл энэ удаа шигшээ баг нь дэлхийн аваргын эрхээ авлаа. Тамирчид нь дэлхийн топ лигүүдэд гялалзаж байна. Тухайлбал, Манчестер Ситигийн хамгаалагч Абдукодир Хусанов, Италид олон жилийг үдэж буй довтлогч Элдор Шомуродов, Оросын ЦСКА Москвагийн од, Азийн шилдэг залуу хөлбөмбөгчин болж байсан Аббосбек Файзуллаев зэрэг тамирчид бий.

Узбекистаны хөлбөмбөгийн шигшээ баг яг 10 жилийн өмнө дэлхийн чансааны 119 дүгээр байрт бичигдэж байсан түүхтэй. Мөн 2006 болон 2014 онуудын ДАШТ-ий эрхийг авахад тун ойрхон байсан ч бүтэлгүйтсэн удаатай.