Монголын төр Л.Оюун-Эрдэнэ гэж хүнээс болж тэг зогсолт хийгээд сар болох гэж байна. Түүний хүү О.Тэмүүлэнгийн тансаглал олон нийтийн сүлжээнд цацагдсанаас хойш монголчууд хоёр талцан, залуус Л.Оюун-Эрдэнийг огцруулахыг шаардаж, зарим лүүзэрүүд Л.Оюун-Эрдэнийн өмнөөс уйлж, хашгирч, өлсөж, жагсав. Үндсэндээ М.Энхболдыг огцруулахдаа хэлж байсан үгээ Л.Оюун-Эрдэнэ эрх мэдэлтэйгээ хольж идсэн нь өнөөдрийн Монголын гол зовлон болж хувирав.

Авлига, албан тушаалын гэмт хэрэгтэй тэмцэхээ анх зарлаж, “намаа бодох уу, улсаа бодох уу” гэх асуултыг нийгэмд шидлэж суусан Ерөнхий сайд асан Л.Оюун-Эрдэнэ өөрөө улсаасаа баян улстөрч болсныг түүний хамаарал бүхий хүмүүсийн тансаг хэрэглээ нотлов.

Эцгийнх нь тайлбарласнаар зураг зурах дуртай 20 настай хүүгийн найз бүсгүйдээ авч өгсөн алмаз бөгжийн үнэ болох 17 сая төгрөг нь жирийн багшийн жилийн цалинтай тэнцэх мөнгө юм.

Түүнчлэн улсын төсвийг захиран зарцуулах эрхтэй Ерөнхий сайд Л.Оюун-Эрдэнэ болон түүний төрсөн ах “Херо энтертаймент”-ийн Б.Баатар нарын тансаг зэрэглэлийн хос хоёр машины үнэ нийтдээ 10 тэрбум болж байгаа. Энгийнчилбэл, тэрхүү 10 тэрбум төгрөгөөр 250 хүн хөл дүүжлэх пирустай болж чадна. Гэх мэтчилэн Ерөнхий сайд Л.Оюун-Эрдэнийн авлига, албан тушаалтай холбоотой байж болзошгүй асуудал түүнийг огцруулах үндсэн шалтгаан болсон билээ.

Өөрөөр хэлбэл, О.Тэмүүлэнгийн үеийн залуус Ерөнхий сайдын ах дүү, үр хүүхдийн хэрээс хэтэрсэн тансаглалыг эсэргүүцэж, “огцор, орлогоо нотол” гэсэн шаардлага тавьж жагссан нь ардчилсан улсад зүй ёсны тэмцэл байв. Улсын авдар дээр сууж буй хүний хувьд, мөн Нийтийн албан тушаалтны хууль бус хөрөнгийг хураах төслийг УИХ-д өргөн барьсан Гүйцэтгэх засаглалын тэргүүний хувиар Л.Оюун-Эрдэнэ хүүтэйгээ хамт орлогоо нотлох нь хууль засагладаг оронд тавигддаг ганц шаардлага. Гэвчиг орлогоо хууль ёсны мөн эсэхээ одоо ч олон нийтэд нотлож чадаагүй яваа Л.Оюун-Эрдэнийг иргэд эсэргүүцэх олон шалтгаантай байсан.

Ерэн оноос хойш Л.Оюун-Эрдэнэ Монгол Улсын гүйцэтгэх засаглалын тэргүүнээр хамгийн өнө удаан оршин тогтсон Ерөнхий сайдаар тодорсон. Тэрбээр дөрвөн жил гаруй Ерөнхий сайдын албыг хашихдаа хар пиарын аргад хамгийн их мэргэшсэн, амташсан улстөрч болж хувирсан. Хамтарсан засгийн бодлогыг эсэргүүцсэн бүхнийг тэрбээр нэг нэр, хоёроос дээш хочтой болгож, хэвлэл мэдээлэл, олон нийтийн сүлжээнд шидэж өгөх нь хэрээс хэтэрсэн. Өөрөөр хэлбэл, өрсөлдөгч нараа хар пиараар ялахын тулд Монголын татвар төлөгчдийн мөнгөөр нийгмийн сүлжээнд тролл ажиллуулах нь бараг хэвийн үзэгдэл болсон.

Үндсэндээ Хамтарсан Засгийн газрын 14+ мега төслүүдээс хамгийн сайн хэрэгжсэн нь хар пиарын төсөл байлаа.

Монголын улс төр хар пиараас ангид байгаагүй ч Женко.Баттулга төрд орж ирснээс херопаганда пропагандаг хол хаях хэмжээнд очсон. Нэг нэрээ хоёр болгож, нэг зүсээ элдэв янзаар будуулаагүй, херопагандад хэрчүүлээгүй улстөрч Монголд байхгүй. Анх АН-ын нэртэй зүстэй болгоныг онилсон херопагандагаас хийсэн ажиллагаа нь: Тангаргийн буг, тагнуулчин, оффшорчин, оюутолгойчин, мүүнчин, сайн ах, хужаагийн эрлийз гэх мэтчилэн. Намдаа нөлөөтэй, оролцоотой бүхнийг херопагандагийн хонгилоор оруулж, улс төрийн оролцоог нь хумиж, нийгэмд гарах нэр нүүргүй болгодог нь хэвийн үзэгдэл болсон. Одоо ч херопаганда ордын улс төрөөс бүр яваагүй байна.

Херопаганда бол хар пиар-хагарал талцлын загалмайлсан эцэг гэж хэлж болно. Хар массын хаан ч гэхэд буруудахгүй. Олон нийтийг тархийг угааж,  монголчуудыг монголчуудтай нь хагаралдуулдаг энэ технологийг Ерөнхийлөгч асан Женко.Баттулгын Монголын улс төрд нутагшуулсан. Ерөнхий сайд асан Л.Оюун-Эрдэнэ улам төгөлдөржүүлсэн. Иймээс л Л.Оюун-Эрдэнэтэй, Х.Баттулгатай нь хамт энэ бохир технологийг Монголын улс төрөөс устгах ёстой юм.

Л.Оюун-Эрдэнэ Ерөнхий сайд болсон цагаасаа нийгмээ хагарал талцалд уриалж ирсэн. Байнга л төрийн дайсан тодруулж, түмний өмнө шившиглэхдээ гарамгай тоглодог. Женкогийн дайснууд бол Л.Оюун-Эрдэнийн дайсан болж хувирсан. Өөрөөс нь өөр үзэлтэй үндэсний лидерүүд, үндэсний хөрөнгө оруулагчдаас болоод үг хэлсэн, үзэл бодлоо илэрхийлсэн болгоныг тэрбээр үндэсний дайснаар зарладаг болсон. Өмч хөрөнгийг нь хууль шүүхгүйгээр хурааж эхэлсэн.

Иймээс Л.Оюун-Эрдэнэ орлогоо нотлож чадаагүйн дээр иргэдээ хагалж хуваасан хар пиараасаа болж унасан. Тиймээс шинэ засгийн шинэ нэкстэд анхааруулахад, ард иргэдээ хагалж хуваасан хар пиарын, "хараал идсэн" херопагандагаас Монголын төрийг нэг мөр цэвэрлэх ёстой юм. Тэгж байж монголчууд эвтэй болно. Эвтэй монголчууд хүчтэй болно. Хүчтэй монголчууд гэдэг хөгжил, дэвшил юм.

Ж.ЭРХЭС