Анагаахын шинжлэх ухааны үндэсний их сургууль нь дэлхийн их сургуулиудын 1237 дугаар байрт эрэмбэлэгджээ. Өөрөөр хэлбэл, олон улсын хянан магадалгаа хийдэг "Scopus", "Web of Science" мэдээллийн санд бүртгэлтэй эрдэм шинжилгээний бүтээлийн тоог нэмэгдүүлэх, чанарыг сайжруулах, сургалтын хөтөлбөрүүдийг олон улсын стандартад нийцүүлэн магадлан итгэмжлүүлэх, гадаад хамтын ажиллагааг эрчимжүүлэх, их сургуулийн эмнэлгийн тогтолцоог хөгжүүлэх чиглэлээр хийсэн тогтвортой бодлого, үйл ажиллагааны үр дүнд дэлхийн их сургуулиудын эрэмбийг тогтоодог "Round university ranking"  байгууллагын шалгуурыг хангасан байна.

Дэлхий даяар 25 мянга гаруй их сургууль үйл ажиллагаа явуулж байна. Их сургуулиудын эрэмбийг тогтоодог 80 гаруй байгууллага байдгаас /RUR/ нь эхний шилдэг 10-т багтдаг нэр хүндтэй байгууллага юм. Энэ олон улсын байгууллага нь эрэмбийг тогтоохдоо эрдэм шинжилгээ, сургалт, гадаад харилцаа, санхүүгийн тогтвортой байдал гэсэн дөрвөн үндсэн үзүүлэлтийн хүрээнд нийт 20 дэд шалгуурт нарийвчилсан дүн шинжилгээ хийж, эрэмбийг тогтоодог байна. Энэхүү амжилт нь Монгол Улсын дээд боловсрол, эрүүл мэндийн салбарын хамтын амжилт гэдгийг эрдэмтэн судлаачид онцолж байна.