Улаанбаатарын зарим байршилд хөлдөх эрсдэл үүссэн талаар Хотын дарга Х.Нямбаатар анхаарууллаа. Хэд хэдэн байршилд ирэх өвөл хөлдөх эрсдэл үүссэн тул шинэ Засгийн газар яаралтай арга хэмжээ авах хэрэгтэйг ч сануулсан байна. Тодруулбал, энэ сарын 2-3 нд шилжих шөнө "ДЦС-3"-ын өндөр даралтын хэсэгт гарсан ослын улмаас 1200-1500 тн орчим халуун ус буюу 100 г/кал дулааны ачаалал, 50 МВт цахилгааны ачаалал доголдож, Хан-Уул дүүргийн Мишээл, Зайсан, Оргил, Удирдлагын академи, Хүннү, Жапан таун, 120 мянгат, 19 дүгээр хороолол, Их тэнгэр, Маршал, Баруун 4 замаас Чингис зочид буудал хүртэлх хотын төв орчмын хэрэглэгчдийн дулааны ачаалал 15 хувиар буурахаар болсон талаар хотын дарга Х.Нямбаатар мэдэгдлээ.

Тэрбээр, шинэ Засгийн газар яаралтай арга хэмжээ авахгүй бол дээр дурьдсан байршлууд ирэх өвөл хөлдөх бодит эрсдэл үүснэ.

Нийслэлээс өнгөрсөн жил эрчим хүчний салбарт хөрөнгө оруулалт хийсний үр дүнд 200 MBт цахилгаан үйлдвэрлэл нэмэгдүүлж 2024-2025 оны өвлийг давсан. Харамсалтай энэ ослоор эрдэнэт хүний амь эрсдэж улсад ихээхэн хохирол учирлаа. Улаанбаатарчууд ирэх өвлийг дулаан давахад Засгийн газар уг асуудлыг нэг өдөр ч алдалгүй анхаарна гэдэгт итгэлтэй байна гэв.

Дулааны III цахилгаан станцад гарсан галын улмаас нэг ажилтан амь насаа алдсан харамсалтай осол гарсантай холбоотой энэ салбарт ажиллаж байгаа хүмүүсийн хөдөлмөрийн аюулгүй байдал хангагдаагүйг Үйлдвэрчний эвлэлийн холбоо нь өчигдөр /2025.06.05/ мэдэгдсэн. Асуудлын учир шалтгаан нь эрчим хүчний салбарт бодлогын болоод техник технологийн шинэчлэл байхгүйтэй холбоотой гэж тэд үзэж байгааг мэдээлсэн.