Путин, Трамп нар Лхагва гаригт /2025.06.04/ утсаар ярьжээ. Энэ үеэр Трамп Украины нисгэгчгүй онгоцны дайралтад ОХУ хариу өгөхөөс өөр аргагүй гэж хэлсэн байна. Трамп дайныг зогсооно гэж ярьдаг ч гэлээ энэ үг нь нөхцөл байдлыг улам дэвэргэх эрсдэлтэй юм.

Хоёр удирдагч ойрын хугацаанд ийнхүү хоёр дахь удаагаа утсаар ярьж байна. Энэ удаад тэдний яриа 75 минут үргэлжилжээ. Трамп утсаар ярисныхаа дараа цахим сүлжээндээ "75 минут ярилаа гээд Украины дайныг шууд зогсоочихгүй. Украины арми Оросын онгоцнууд руу халдсан тухай болон өөр бусад асуудлын талаар бид хэлэлцлээ. Сайхан ярилцлаа. Гэлээ гээд нэн даруй энх тайван тогтчихгүй. Ерөнхийлөгч Путин агаарын баазууд руу нь халдсан явдал хариу барина гэж шийдэмгий хэлсэн" гэжээ.

Кремлийн туслах Юрий Ушаков тэднийг Украины дайралтын талаар ярисныг баталсан ч гэлээ Путин хариугаа авна гэж хэлсэн талаар дурдаагүй байна.

Харин Украины хууль тогтоогч Александр Мережко Оросын хариу арга хэмжээг Трамп үг дуугүй зөвшөөрч байна гэж эмээж буйгаа илэрхийлжээ. Тэрбээр "Ерөнхийлөгч Трамп Владимир боль ч юм уу тиймэрхүү зүйл огт хэлээгүй. Путины үйлдэх гэж буй шинэ гэмт хэрэгт ногоон гэрлээр зөвшөөрөл өгч байгаа мэт энэ байдал нь үнэхээр санаа зовоож байна" гэжээ.

Путин Лхагва гаригт утсаар ярих үеэрээ Трампад Истанбулын хэлэлцээний талаар мэдээлэл өгсөн байна. Ингэхдээ "Украины арми Киевийн дэглэмийн шууд даалгавраар энгийн иргэд рүү чиглэсэн дайралт хийж, хэлэлцээг тасалдуулахыг оролдсон" гэж хэлжээ.