Оросын сөрөг хүчний удирдагч агсан Алексей Навальныйн эхнэр болон Хил хязгааргүй сурвалжлагчид олон улсын байгууллага Оросын цензурт автахгүй байх, Кремлийн шүүмжлэгчийн өвийг хадгалах зорилготой телевизийн суваг нээгдсэнийг магтан сайшаав. Оросын ирээдүй нэртэй уг суваг нь Францын Хил хязгааргүй сурвалжлагчид хэвлэлийн эрх чөлөөг хамгаалах байгууллагын удирддаг хиймэл дагуулын платформоор цацагдах болно. Навальныйн баг цөллөгт байх хугацаандаа "YouTube" сувагтаа зориулан бэлтгэсэн контентыг нэвтрүүлэг болгон олон нийтэд хүргэх юм байна.

Юлия Навальная Мягмар гаригт (2025.06.03) Парис хотноо хийсэн товч мэдэгдэлдээ "Энэ бол урт удаан хамтын ажиллагаа байх болно гэж бодож байна" гэжээ. Мөн түүний баг хамт олон "YouTube"-ээр оросуудтай холбогдож, Кремлийн суртал ухуулагт өртөхгүй байхыг уриалж байгаа гэсэн юм. Гэвч Кремль барууны платформыг хаахыг оролддог гэж тэрбээр мэдэгдсэн байна. Үргэлжлүүлэн Навальная хэлэхдээ, "Орос улсын бүх зүйл цензуртэй байдаг бөгөөд дарангуйллын үед мэдээлэл түгээх нь маш хэцүү" гэж гэсэн байна. 2022 оны хоёрдугаар сард Владимир Путин Украин рүү түрэмгийлэх тушаал буулгаснаас хойш Москва олон нийтийн эсэргүүцлийн бүх хэлбэрийг хориглож, бие даасан хэвлэл мэдээлэл болон барууны олон нийтийн мэдээллийн хэрэгслийг хориглосон.

"Бид Оросын хүн амд чадах чинээгээрээ хүрч ажиллах нь үнэхээр чухал гэж бодож байна" гэж Хил хязгааргүй сурвалжлагчид байгууллагын тэргүүн Тибо Бруттин мэдэгджээ.

Навальный 49 нас хүрэх байсан тэр өдөр буюу зургадугаар сарын 4-ний Лхагва гаригт түүний дурсгалыг хүндэтгэх нэвтрүүлгийн суваг ажиллаж эхлэжээ. Свобода хиймэл дагуулын төслийн захирал Жим Филлипоф хэлэхдээ, нэвтрүүлгийн суваг нь Навальныйгийн багийн хийсэн контентыг орос хэлээр ярьдаг үзэгчдэд хүргэж байгаагаараа чухал юм. Учир нь оросудын 45 орчим хувь нь хиймэл дагуулын дохиог телевиз үзэхийн тулд ашигладаг байна.