АНУ гурван жилийн өмнө Украинд цэргийн тусламж үзүүлэх олон улсын бүлгийг байгуулсан. Тус бүлгийн ээлжит уулзалт өнөөдөр /2025.06.04/ болж байгаа бөгөөд батлан хамгаалахын 50 гаруй удирдагчид оролцоно. Гэвч Пентагоны тэргүүн анх удаа энэ уулзалтад оролцохгүй алгасаж байна. Батлан ​​хамгаалахын сайд Пит Хегсет цахим байдлаар ч уг уулзалтад оролцохгүй.

Энэ нь Украинд туслах хүчин чармайлтаа сулруулж буй АНУ-ын цуврал арга хэмжээний нэг юм.

Өнгөрсөн амралтын өдрөөр Сингапурт болсон аюулгүй байдлын бага хурлын үеэр Францын ерөнхийлөгч Эммануэль Макрон “АНУ болон бусад улс Хятадтай болзошгүй мөргөлдөөн үүсэх вий гэдэгт анхаарлаа төвлөрүүлж, Украиныг орхивол энэ нь дабл стандарт болно. АНУ Украиныг орхивол сул дорой харагдахаас гадна Тайванийн асуудлаар Вашингтоныг буруутгахад Хятадад түлхэц болно” гэж анхааруулжээ.

АНУ Европоос цэргээ татаж, Энэтхэг-Номхон далай руу шилжүүлэхээр хэлэлцэж байгаад Франц болон НАТО-гийн бусад орон санаа зовж байна.

Пентагоны тэргүүн асан Ллойд Остин 2022 онд ОХУ-аас Украинд түрэмгийлсний дараа тус бүлгийг үүсгэн байгуулсан. Тэр цагаас хойш гишүүн 50 гаруй улс хамтран Украинд 126 тэрбум ам.долларын зэвсэг, цэргийн тусламж үзүүлжээ. Үүний 66.5 тэрбум нь АНУ-аас үзүүлсэн тусламж байв.

Ллойд Остины удирдлага дор АНУ тус бүлгийн даргаар ажиллаж байсан ч Хегсэт энэ үүргээс татгалзсан юм. Өдгөө бүлгийн удирдлагыг Герман, Их Британи хариуцаж байна.