Дулааны гуравдугаар цахилгаан станцад гарсан галын дүгнэлт гарсан эсэх асуудлаар Цагдаагийн байгууллагаас тодрууллаа. Ингэхэд, гал гарсан шалтгаан нөхцөлийг тогтоохоор шалгалтын ажиллагаа явуулж байна. Одоогийн байдлаар, гал гарсан шалтгаан тодорхой болоогүй байна гэв.

Дулааны гуравдугаар цахилгаан станцын турбин цехэд энэ сарын 2-ны өдөр 00:27 цагт гал гарсан. Энэ үеэр тухайн станцад 20 гаруй жил ажилласан инженер залуу нас барсан талаар бид мэдээлсэн. ДЦС-3 2015 онд Чингис бондын санхүүжилтээр 50 мВт-ийн хүчин чадалтай шинэ турбин генератор суурилуулсан байдаг. Уг суурилуулсан генератор шатаж дахин ашиглах боломжгүй болсон гэх албан бус мэдээлэл бий.

Дулаан гуравдугаар цахилгаан станц 1965 онд байгуулагдсан. Өдгөө 60 жил болж буй. Өнөөдрийн байдлаар өндөр даралтын тавдугаар турбин ашиглалтын хугацаа дуусч ашиглахгүй байгаа. Мөн долдугаар турбины хугацаа дуусаж байгаа.

Түүнээс гадна нам даралтын 12 мегаваттын дөрвөн турбин бүгд ашиглалтад дууссан. Төвийн эрчим хүчний системд зургаан цахилгаан станц холбоотой байгаагаас 220Мв-тай тэнцэх хэмжээний турба генераторууд ашиглалтын хугацаа дууссан, хэзээ мөдгүй осол гарахад бэлэн сүүлийн хэдэн жил болсон гэдгийг салбарын сайд нь мэдээлсэн.

Гэтэл тус станцыг хариуцаж авч яваа удирдлагуудын зүгээс осолтой холбоотой ямар ч тайлбар мэдээлэл өгөөгүй байна. Салбарын сайд нь ёс зүйн хариуцлага хүлээнэ гэдгээ мэдэгдээд буй. Улс орны эрчим хүчийг хангадаг ганц станц нь хэдийн хүчин чадлаа дийлэхээ больсон, дээрээс нь том хэмжээний улсад хохирол учруулахуйц осол гэмтэл гарсан бол албан тушаалаа өгөөд асуудал шийдэгдэхгүй байлтай.