Монгол Улсын Ерөнхий сайд Л.Оюун-Эрдэнийн хүү Тэмүүлэнгийн тансаг хэрэглээ нийгмийг бухимдуулж, улмаар “Огцрох амархан” жагсаалын эхлэл болсон. Залуус голдуу бүрэлдэхүүнтэй тус жагсаал 21 хоног үргэлжилсний эцэст Ерөнхий сайд Л.Оюун-Эрдэнэ огцорсон билээ. Энэ үйл явдал “Associated Press”, “BBC”, “Reuters”, “NBC”, “DW”, “Al Jazeera”, “Time”, “Politico” зэрэг гадаадын томоохон хэвлэлүүдийн анхаарлыг татаж, онцлон мэдээлсэн байна.

Тухайлбал, “Associated Press” агентлаг “Ерөнхий сайд нь огцорсон тул байгалийн баялаг ихтэй Монгол Улс улс төрийн тодорхойгүй байдалтай тулгарав” гэсэн гарчигтай нийтлэл гаргажээ.

Тус нийтлэлийн агуулгаас түүвэрлэн хүргэвэл “Байгалийн баялаг ихтэй, Хятад, Оросын дунд орших, далайд гарцгүй Азийн улсад гаарсан авлигыг ард иргэд нь эсэргүүцсэний улмаас Ерөнхий сайд нь огцров. Ийнхүү тус улс улс төрийн тодорхойгүй байдалтай тулгарч байна. Ерөнхий сайд Л.Оюун-Эрдэнийн хүүгийн найз бүсгүйдээ зориулсан тансаг эд зүйлсийн талаарх мэдээллийг харвал Монголд экспортоос баяжигсад болон ядууралд автсан иргэдийн хооронд асар их ялгаа байна.

Монгол Улс өндөр технологийн үйлдвэрлэлд ашигладаг нүүрс, зэс болон бусад байгалийн нөөц баялагтай. Гадаадын уул уурхайн томоохон компаниудтай хэлэлцээр хийж эхэлснээс хойш энэ баялаг хэнд ашигтай вэ гэдэг нь гол асуудал болсон. Нууц гэрээ хэлцэл, төлбөр тооцооны тухай цуурхал тус улсад олон жилийн турш тархсан. Жагсагчдын хувьд ашигт малтмалын баялгийг чинээлэг хүмүүсийн ашиг сонирхолд л нийцсэн гэж үзэж байна.

Монгол Улсын дараагийн Ерөнхий сайдаар хэн ч томилогдсон байсан бодлогод томоохон өөрчлөлт орохгүй гэсэн байр суурийг ХБНГУ-ын Манхаймын их сургуулийн Монгол хариуцсан мэргэжилтэн Жулиан Диеркес хэлсэн юм” гэжээ.

Харин Францын “Le Monde” хэвлэлд “Монгол Улсын Ерөнхий сайд Л.Оюун-Эрдэнэд итгэл үзүүлэхийг УИХ-ын гишүүдийн олонх дэмжээгүй учир зургадугаар сарын 3-ны өдөр албан тушаалаасаа огцорлоо. Авлигын хэргийг эсэргүүцсэн жагсаал олон хоног үргэлжилсний эцэст нууц санал хураалт явуулсан юм.

Хойд Азийн далайд гарцгүй ардчилсан орон болох Монгол Улс олон арван жилийн турш авлигатай тэмцсээр ирсэн. Нүүрс олборлолтоос олсон ашгийг тус улсын чинээлэг хүн ам хуримтлуулж, нийт иргэдийг хохироож байна гэж үздэг. Л.Оюун-Эрдэнэ 2021 онд засгийн эрхэнд гарснаас хойш Монгол Улс Транспэрэнси Интернэшнл байгууллагын авлигын индексээр огцом унажээ.

Өнгөрсөн онд болсон сонгуулиас хойш Монгол Улс гурван талт эвслийн засгийн газартай болсон. Гэвч өнгөрсөн сард Ардчилсан намын зарим гишүүд Л.Оюун-Эрдэнийг огцруулахыг дэмжсэнээр Монгол ардын нам тэднийг эвслийн гэрээнээс хассан юм” гэжээ.

“Politico” хэвлэл Стратегийн болон олон улсын судалгааны төвийн мэргэжилтэн Эрин Мерфигийн хэлсэн үгнээс эш татан мэдээлжээ. Тэрбээр “Ард түмний бухимдлын гол эх үүсвэр болсон эдийн засгийн асуудлаа шийдвэрлэх шаардлагатай байгаа Монгол Улсын хувьд ардчиллын суурийг бий болгоход маш хэцүү байна. Цаашид юу болох, шинэ засгийн газар нь энэ асуудлыг хэрхэн шийдэхээр төлөвлөж буйг харж байя. Монгол дахь ардчилал бүрэн хөгжөөгүй байна. Гэхдээ үндэс суурь нь тавигдсан” гэжээ.

Үндсэндээ Монгол Улсын байгалийн баялаг, чинээлэг хүн ам болон ард иргэдийн хоорондын ялгаа, Ерөнхий сайд асан Л.Оюун-Эрдэнийг огцроход хүргэсэн дуулиан, түүнд итгэл үзүүлэх эсэх санал хураалт гэх мэтээр Монголд тулгамдаад буй үндсэн асуудлууд, сүүлийн үед болсон үйл явдлуудыг олон улсын хэвлэлүүд ижил төстэйгөөр тоймложээ. Бид энд гурван хэвлэлийн нийтлэлээс онцлон хүргэв.