Ерөнхий сайдад итгэл хүлээлгэх эсэх тухай УИХ-ын тогтоолын төслийг өчигдөр /2025.06.03/ ээлжит бус чуулганаар хэлэлцэж, нийт гишүүдийн олонх буюу 64 гишүүн дэмжих ёстой байсан. Санал хураалтад нийт 82 гишүүн оролцсоноос 44 нь Ерөнхий сайдад итгэл хүлээлгэхийг дэмжсэн бол 38 нь дэмжээгүй санал өгсөн юм. Тиймээс УИХ-ын нийт гишүүдийн олонх Ерөнхий сайдад итгэл хүлээлгэх тухай УИХ-ын тогтоолыг төслийг батлаагүй гэж үзэн Ерөнхий сайдыг огцорсонд тооцов. Ингэснээр дараагийн Ерөнхий сайдаар хэн гэдэг улстөрч томилогдон ажиллах вэ гэдэг асуудал олны анхаарлыг татаж байна.

ЕТГ-ын дарга Г.Занданшатар:

Улс төрийн карьераа 1998 онд одоогийн МАН-д элссэнээр эхлүүлж, намын дэргэдэх залуучуудын байгууллагад ажиллаж байгаад 2004 оны УИХ-ын сонгуулийн долдугаар тойрогт өрсөлдсөнөөр анхны ялалтаа байгуулжээ. Харин 2016 оны УИХ-ын сонгууль гурав дахь удаагийн ялалт нь болсон байна. Тэрбээр сүүлд 2024 оны УИХ-ын сонгуульд нэгдүгээр тойргоос нэр дэвшсэн боловч иргэдийн итгэлийг хүлээж, сонгогдож чадаагүй юм. Тэрбээр одоо Ерөнхийлөгчийн Тамгын газрын даргаар ажиллаж байна. Тэрбээр өмнөх Засгийн газрын үед У.Хүрэлсүхийн танхимд ЗГХЭГ-ын даргаар ажиллаж байсан нэгэн.

Тэрбээр 2019 оны хоёрдугаар сарын 1-нд анх УИХ-ын даргаар сонгогдсон бөгөөд 2019-2023 онд буюу сүүлийн таван жилийн хугацаанд АТГ-т хөрөнгө орлогоо мэдүүлжээ.

Түүний жилийн нийт орлого нь 2019 онд 124 сая төгрөг байсан бол 2023 онд 83 сая төгрөг болж буурчээ. Тэгвэл гэр бүлийн нийт гишүүдийн орлого нь 2019 онд 74 сая төгрөг байсан бол 2023 онд 254 сая төгрөг болж өссөн гэж мэдүүлсэн байна.

Харин нэг нийтийн орон сууцтай, үйлдвэрлэлийн зориулалтын нэг барилгатай, нэг зуслангийн байшинтай бөгөөд нийт  1.1 тэрбум төгрөгийн үнэтэй ажээ. Мөн "Nissan Murano" маркийн нэг автомашинаа 80 сая төгрөгөөр үнэлжээ. Мөн тэрбээр таван адуугаа 15 сая төгрөгөөр үнэлсэн бол эзэмших эрхтэй нэг газраа 4.9 сая төгрөгөөр үнэлсэн байна. Үүнээс гадна 130 сая төгрөгийн үнэт эдлэлтэй. Мөн дотоодын банкинд 286 сая төгрөгийн хадгаламжтай гэж хөрөнгө орлогын мэдүүлэгтээ мэдүүлснээс хойш хоёр жил өнгөрчээ. Тэрбээр "Монитор консалтинг групп" ХХК, "Нэгүн кашмер" ХХК-нд хөрөнгө оруулалт хийсэн байна.

ЗГХЭГ-ын дарга Н.Учрал:

Н.УЧРАЛ

Аль эртнээс л дараагийн Ерөнхий сайд гэж нэр нь сэвэгдэж ирсэн. У.Хүрэлсүхийн бас нэг хуурай дүү. Түүнийг улс төрд хөл оруулсан хүн бол мэдээж Ерөнхийлөгч. Тиймээс Ерөнхийлөгчийн улс төр явж байна гэж харвал ЗГХЭГ-ийн даргаас Засгийн газрын тэргүүн болж дэвших боломжтой кандитатаар нэрлэгдэж байна. Тэрбээр 2016 оны долдугаар сарын 5-нд анх УИХ-ын гишүүнээр сонгогдсон бөгөөд 2019-2023 онд буюу сүүлийн таван жилийн хугацаанд АТГ-т хөрөнгө орлогоо мэдүүлжээ.

Түүний жилийн нийт орлого нь 2019 онд 222 сая төгрөг байсан бол 2023 онд 700 сая төгрөг болж өсчээ. Тэгвэл гэр бүлийн нийт гишүүдийн орлого нь 2023 онд 58 сая төгрөг гэж мэдүүлсэн байна.

Харин гурван нийтийн орон сууцтай, үйлдвэрлэлийн зориулалтын нэг барилгатай, хоёр зуслангийн байшин нь 3.5 тэрбум төгрөгийн үнэтэй ажээ. Мөн "Mercedes Benz-G 500", "Lexus-570", "Nissan Tiida", "Mercedes Benz-S400" маркийн дөрвөн автомашинаа 965 сая төгрөгөөр үнэлжээ. Мөн тэрбээр 180 хонь, 20 адуугаа 31 сая төгрөгөөр үнэлсэн бол эзэмших эрхтэй нэг газраа 150 сая төгрөгөөр үнэлсэн байна. Үүнээс гадна 85 сая төгрөгийн үнэт эдлэлтэй. Мөн дотоодын банкинд  2 тэрбум төгрөгийн хадгаламжтай гэж хөрөнгө орлогын мэдүүлэгтээ мэдүүлснээс хойш хоёр жил өнгөрчээ. Тэрбээр "Гоц жаалууд цэцэрлэг" ХХК, "Рояал Академи" ХХК, "Грийн Ланд групп" ХХК, "Массив трейд" ХХК, "Их Засаг" олон улсын их сургууль ХХК хөрөнгө оруулалт хийсэн байна.

Сангийн сайд Б.Жавхлан:

Цар тахлаас хойш эдийн засгаа өсөлтөд хүргэх, төсөв батлах гээд Л.Оюун-Эрдэнийн Засгийн газрын олон гавьяаны эзэн бол Сангийн сайд Б.Жавхлан. Улс төрийн хувьд Б.Жавхлан Ерөнхий сайд Л.Оюун-Эрдэнийн, Ерөнхийлөгч У.Хүрэлсүхийн ч дэмжлэгтэй нэгэн гэгддэг. Дархан-Уул аймгаас хоёр дахь удаагаа сонгогдож, Л.Оюун-Эрдэнийн Засгийн газарт Сангийн сайдаар ажиллаж байгаа тэрбээр банкны салбараар мэргэшсэн улстөрч.

Ажлын гараагаа Монголбанкнаас эхэлж, банкны салбарт 1997 оноос хойш ажилласан учраас энэ танхим дотроо эдийн засаг, банкираар мэргэшсэн хүн гэж түүнийг тодорхойлж болно. Тиймээс ч Л.Оюун-Эрдэнэ Засгийн газраа бүрдүүлэхдээ төсөв, санхүүгийн асуудлаа түүнд даатгасан нь учиртай.

Анх түүнийг улс төрд хөтөлсөн, нутгийн дүүгээ банкны салбараас улс төрд “урвуулсан” хүн нь У.Хүрэлсүх гэдэг.  Түүгээр зогсохгүй тэр УИХ-ын дарга Г.Занданшатартай тун ойр. Харин энэ цаг үед Л.Оюун-Эрдэнийн Засгийн газрын “гал хамгаалагч”. Тиймээс түүнийг төрийн гурван өндөрлөгийн “холбогч” гэж болно.

Тэрбээр 2016 оны долдугаар сарын 5-нд анх УИХ-ын гишүүнээр сонгогдсон бөгөөд сүүлийн гурван жилийн хугацаанд Сангийн сайдын албан тушаалаар АТГ-т хөрөнгө орлогоо мэдүүлжээ.

Түүний жилийн нийт орлого нь 2019 онд 26 сая төгрөг байсан бол 2023 онд 65 сая төгрөг болж өсчээ. Тэгвэл гэр бүлийн нийт гишүүдийн орлого нь 2023 онд 63 сая төгрөг гэж мэдүүлсэн байна.

Харин нэг нийтийн орон сууцтай бөгөөд 1.3 тэрбум төгрөгийн үнэтэй ажээ. Мөн "Toyota, LEXUS RX330" маркийн автомашинаа 194 сая төгрөгөөр үнэлжээ. Мөн тэрбээр 70 адуу, 75 хурдан удмын адуу, 70 үхрээ 668 сая төгрөгөөр үнэлсэн байна. Үүнээс гадна 70 сая төгрөгийн үнэт эдлэлтэй. Мөн дотоодын банкинд 18 сая төгрөгийн хадгаламжтай бол 123 сая төгрөгийн зээлтэй гэж хөрөнгө орлогын мэдүүлэгтээ мэдүүлснээс хойш хоёр жил өнгөрчээ. Тэрбээр "Дархан мэдээлэл төв" ХХК-нд хөрөнгө оруулалт хийсэн байна.