Өмнөд Солонгосын ерөнхийлөгчийн сонгуулийн санал хураалт өнөөдөр /2025.06.03/ албан ёсоор эхэллээ. Үүнээс өмнө тавдугаар сарын 29, 30-ны өдрүүдэд эрт санал хураалт түүхэнд байгаагүй ирц сайтай болсон. Тодруулбал, энэ хоёр өдөр нийт сонгогчийн 34.74 хувь нь саналаа өгчээ.

Үндэсний сонгуулийн хорооноос мэдээлснээр улсын хэмжээнд 14295 санал авах байр байна.

Санал хураалт өглөөний 06:00 цагт эхэлсэн бөгөөд оройн 20:00 цаг хүртэл үргэлжилнэ. Өглөөнөөс хойш гурван цагийн хугацаанд нийт сонгогчийн 9.2 хувь буюу 4.09 сая орчим хүн саналаа өгчээ. Санал хураалт хаагдсаны дараа саналыг тоолж эхлэнэ гэж тооцвол шөнө дундын орчимд ялагч тодрох магадлалтай.

Санал тоолж дууссаны дараа Үндэсний сонгуулийн хороо Лхагва гаригийн өглөөний 07:00-09:00 цагийн хооронд чуулганыг хуралдуулж, сонгуулийн дүнг албан ёсоор зарлана. Үүнээс хэдхэн цагийн дараа Үндэсний ассамблей дээр тангараг өргөх ёслол болно. Ингээд шинэ ерөнхийлөгч шилжилтийн үегүйгээр шууд ажлаа хүлээж авна.

Ерөнхийлөгчийн сонгуульд нийт таван нэр дэвшигч өрсөлдөж байна. Эндээс хамгийн магадлал өндөртэй нь Ардчилсан намаас нэр дэвшигч Ли Жэ Мён, Ардын хүч намын Ким Мүн Сү нар юм. Бусад гурван нэр дэвшигч нь Шинэчлэлийн намын Ли Жүн Сок, Ардчилсан хөдөлмөрийн намын Квон Ён Гук, бие даан нэр дэвшигч Сон Жин Хо нар юм.

Урьдчилсан санал асуулгын дүнг харахад Ли 40 хувиар тэргүүлж, Ким 30 хувиар удаалж байжээ.

Ли, Ким нар эдийн засгийн өсөлтийг сонгуулийн кампанит ажлынхаа тэргүүлэх амлалт болгосон бөгөөд хиймэл оюун ухааны салбарыг хөгжүүлэхэд онцгой анхаарна гэжээ. Мөн Ли прагматик дипломат бодлого баримтална гэж амласан бол Ким Хойд Солонгосын цөмийн аюул заналхийллийн эсрэг тэмцэхээ амлажээ.

Өмнөд Солонгосын Үндсэн хуулиар ерөнхийлөгч таван жилийн бүрэн эрхтэй сонгогдон ажилладаг. Үүнийг дөрвөн жилийн, хоёр удаагийн бүрэн эрх байх тогтолцоогоор солих саналыг Ли, Ким нарын хэн хэн нь дэвшүүлж байна.