УИХ-ын чуулганаар Монгол Улсын Ерөнхий сайдад итгэл хүлээлгэх эсэх асуудлыг /“Монгол Улсын Ерөнхий сайдад итгэл хүлээлгэх тухай” Улсын Их Хурлын тогтоолын төсөл/ хэлэлцэж байна. Одоогоор хэлэлцэх асуудалтай холбоотойгоор гишүүд асуулт асууж, хариулт авч байгаа юм. Үүний дараа санал хураалт явуулах учиртай. Тэгвэл дээрх асуудалд хэрхэн санал хураах талаар УИХ-ын Ерөнхий нарийн бичгийн дарга Б.Баасандоржоос тодрууллаа.

-АН-ын бүлэг чуулганы хуралдаанд оролцож, ирцээ бүртгүүлнэ. Харин санал хураалтад оролцохгүй гэж мэдэгдсэн. УИХ-ын чуулганы хуралдааны дэгийн тухай хуульд энэ процессыг хэрхэн хуульчилсан байдаг вэ?

-Яг одоо УИХ-ын чуулганы нэгдсэн хуралдаанаар Монгол Улсын Ерөнхий сайдад итгэл хүлээлгэх эсэх тогтоолын төслийг хэлэлцэж байна. Дэгийнхээ дагуу Ерөнхий сайд Л.Оюун-Эрдэнэ үг хэлж, дараа нь ТББХ-ны санал дүгнэлтийг танилцуулсан. Үүний дараа АН-ын бүлгийн дарга О.Цогтгэрэл АН-ын байр суурийг илэрхийлсэн. Ингэхдээ АН-ын гишүүд энэ санал хураалтад оролцохгүй гэдэг зүйлийг чуулган дээр хэллээ. Гэхдээ санал хураалт болох болоогүй байна. Нийт 53 гишүүн асуулт асуухаар нэрээ өгсөн. Тэгэхээр энэ процесс 6-7 цаг үргэлжилнэ.

АН шийдвэрээ гаргасан. Гэхдээ УИХ-ын гишүүний үүрэг гэж бий. УИХ гишүүн ямар тохиолдолд санал хураалтад орохгүй вэ гэдгийг УИХ-ын чуулганы хуралдааны дэгийн тухай хуульд заасан байгаа. Өөрөөр хэлбэл, УИХ-ын гишүүний хувьд Үндсэн хуулийг илтэд зөрчсөн асуудал дээр байр сууриа илэрхийлээд чуулганыг хуралдаанд оролцохгүй байх боломжтой. Харин үүнээс бусад тохиолдолд УИХ гишүүн чуулгандаа суух үүрэгтэй.

-Бүлгийн шийдвэрийн тухайд хэрхэн хэрэгжих вэ?

-ТББХ нууц санал хураалт явуулсан. Чуулганы нэгдсэн хуралдааны хувьд нууц санал хураах асуудлыг шийдээгүй байна. Гишүүдийн олонхын саналаар шийднэ.

Хэрэв ил санал хураалтад оролцохгүй, чуулганы танхимыг орхиж гарах юм бол эсрэг санал өгсөнд тооцогдоно.

Харин нууц санал хураалтад оролцохгүй бол эсрэг санал өгсөнд тооцогдохгүй.