Польшийн ерөнхийлөгчийн сонгуульд барууны үзэлтэй нэр дэвшигч Карол Навроцки 50.89 хувийн саналаар ялалт байгууллаа. Түүний өрсөлдөгч төвийн үзэлтэй Рафаэл Тшасковски 1.78-хан хувийн саналын зөрүүтэйгээр (49.11 хувь) ялагдав. Ялагч Карол Навроцки наймдугаар сарын 6-нд тангараг өргөж, ерөнхийлөгчийн албан тушаалдаа орно.

Түүний ялалт Доналд Тускийн тэргүүлсэн эвслийн засгийн газарт томоохон цохилт болж байна. Тодруулбал, энэ ялалт нь өнөөгийн улс төрийн мухардлыг улам гүнзгийрүүлж, Польшийн Европ дахь байр суурийг ганхуулах магадлалтай.

Польшийн ерөнхийлөгчийг таван жилийн хугацаатай, шууд ардчилсан санал хураалтаар сонгодог. Эхний шатанд хэн ч 50 хувиас дээш санал авч чадахгүй бол хоёр дахь шатанд хамгийн олон санал авсан хоёр нэр дэвшигч өрсөлддөг. 2025 онд нийт 13 нэр дэвшигч бүртгүүлсэн нь 1995 оноос хойших хамгийн өндөр үзүүлэлт байв. 

Шинэхэн ерөнхийлөгчийн талаар товч мэдээлэл хүргэвэл:

Тэрбээр 42 настай бөгөөд Польшийн эрх баригч Хууль ба шударга ёс намын дэмжлэгтэйгээр сонгуульд өрсөлджээ. Ерөнхийлөгч асан Анджей Дуда түүнийг ил тод дэмждэг. Түүний сонгуулийн кампанит ажлын уриа "Польш улс нэгдүгээрт, Польшийн ард түмэн нэгдүгээрт" байв. Тэрбээр Украиныг дэмжсэн бодлого баримталдаг ч гэлээ дайны дүрвэгсдэд олгосон хөнгөлөлтийг буруушаажээ. Тийм учраас  "Нийгмийн тэтгэмжийг юун түрүүнд польш хүмүүст олгоно. Эмнэлгийн үйлчилгээний дарааллын хамгийн эхэнд польш иргэд байна" гэж хэлсэн юм. Мөн тэрбээр Украиныг талархаж мэддэггүй гэж буруутгахын зэрэгцээ НАТО-д элсэх оролдлогыг нь сайшаадаггүй.