Украины нисгэгчгүй онгоцууд Ням гаригийн үдээс хойш Оросын нутаг дэвсгэрийн гүнд тэдний 41 онгоцыг устгажээ. Зеленскийн мэдээлснээр, энэхүү “Web” нэртэй нууц ажиллагаанд 117 нисгэгчгүй онгоц ашигласан байна. Уг халдлагын бэлтгэлд жил хагас гаруй хугацаа зарцуулсан бөгөөд Зеленский өөрөө биечлэн хяналт тавьж ажиллажээ. Үүний тулд "FPV" буюу "First-Person View" нисгэгчгүй онгоцыг зөөврийн модон байшингуудад байрлуулан ОХУ руу оруулж иржээ. Дараа нь модон байшингуудыг ачааны машин дээр байрлуулж байгаад, дээврийг нь алсаас онгойлгож, нисгэгчгүй онгоцуудыг хөөргөсөн байна.

Цахим сүлжээнд тарсан бичлэгүүдээс харахад нисгэгчгүй онгоцууд чингэлэг маягийн зүйл дотроос хөөрч байжээ.

Цэргийн нисэх онгоцны буудлуудад байрлаж байсан А-50, Ту-95, Ту-22М зэрэг онгоц халдлагад өртсөн байна. ОХУ өмнө нь Ту-95, Ту-22 онгоцуудаар Украинд довтолж байсан бол А-50 нь байг зохицуулах, агаарын довтолгооноос хамгаалах пуужинг илрүүлэхэд ашиглагддаг онгоц юм.

Энэхүү халдлагаар Оросын флотын 34 хувийг устгаж, долоон тэрбум ам.долларын хохирол учруулжээ. Хохирлыг тоймловол, Оросын баруун хэсэгт хоёр гүүр нурж, хоёр галт тэрэг замаасаа гарсан байна. Мөн долоон хүн амиа алдаж, олон 10 хүн шархдав. Мөрдөн байцаах хороо хэвлэлийн мэдээндээ анх дэлбэрэлт гэдэг үгийг дурдсан боловч сүүлд нь хассан байжээ.

ОХУ-ын Батлан хамгаалах яам Украинаас 4000 гаруй км зайд орших Эрхүү болон хойд зүгийн Мурманск дахь агаарын баазуудад болсон халдлагын талаарх мэдээллийг баталгаажуулсан байна. Оросын Алс дорнод дахь Амур муж болон баруун хэсгийн Иваново, Рязань мужуудад мөн цохилтыг няцаажээ.

Өнгөрсөн амралтын өдрүүдээр ОХУ ч бас Украинд нисгэгчгүй нисэх онгоцоор цохилт өгчээ. Украины агаарын хүчний мэдээлснээр ОХУ 472 нисгэгчгүй онгоц хөөргөсөн нь дайн эхэлснээс хойших хамгийн өндөр үзүүлэлт болж байна. Эдгээрийн хажуугаар долоон пуужин харважээ.

Дашрамд дурдахад, талууд өнөөдөр Истанбулд гал зогсоох хэлэлцээний шинэ үе шатыг хэлэлцэх учиртай. Украины төлөөлөгчдийг Батлан хамгаалахын сайд Рустем Умеров тэргүүлнэ.