Хятадын гааль дээр сүүлийн үед хар тамхи, зэвсэг зэрэг ноцтой бараа бүтээгдэхүүн бус "Labubu" тоглоом л хураагддаг болжээ. Сүүлийн үед хурааж авсан зүйлсүүдээ хоёр ажилтан сэтгүүлчдэд дэлгэн үзүүлэх үед энэ нь тодорхой болсон байна. Өнгөрсөн дөрөвдүгээр сараас хойш Хятад даяар нийт 462 тоглоомыг гааль хураан авчээ. Уг тоглоомыг дахин худалдаж, ашиг олох зорилготой гэж үзсэн тул ийн хурааж авчээ.

"Pop Mart" тоглоомын дэлгүүрийн "Labubu" тоглоомоор дэлхий амьсгалж байна. Зарим тохиолдолд "Pop Mart" дэлгүүрүүдийн гадаа хэрүүл маргаан ч үүсэх болжээ. Ихэнх тоглоомыг нь үйлдвэрлэдэг Хятадад хүртэл хүмүүс "Labubu" олж авах гэж зүдэрч байна. Бээжингийн төвд байрлах хөл хөдөлгөөн ихтэй "Pop Mart"-аар орж үзэхэд "Labubu" лангуун дээр нэг ширхэг ч байгаагүй бөгөөд шилэн хоргоны цаана л дээж болгож ганцыг тавьсан байжээ.

"Pop Mart"-аар олон жил үйлчлүүлж буй нэгэн хэрэглэгчийн яриснаар "Labubu" худалдаанд гарлаа л бол ихэвчлэн хэдхэн секундэд зарагдаж дуусдаг аж.

Тиймээс албан ёсны сувгаар дамжуулан тус тоглоомыг авах бараг боломжгүй. Ихэнх хэрэглэгч албан бус эх сурвалж буюу хууль бус наймаачдад ханддаг.

"Labubu" нь Хонгконгийн зураач Касинг Лунгийн бүтээл бөгөөд 2015 онд дебют хийснээсээ хойш үнэнч шүтэн бишрэгчидтэй болсон тоглоом. Гэхдээ сүүлийн саруудад улам их алдаршиж, дэлхийн хэмжээний од болжээ. Лиза, Дуа Липа, Рианна зэрэг алдартан "Labubu"-г аз дагуулдаг зүүлт маягаар зүүж явсан билээ. Тэр бүү хэл тус тоглоом Парисын загварын долоо хоногоор хүртэл олны анхаарлыг татжээ.

"Labubu"-ийн хамгийн сүүлийн үеийн 3.0 цуврал 584 юанийн үнэтэй боловч хуучин барааны зах дээр 1000-2000 юаниар зарагдаж байна.

Харин "Pop Mart"-ын дэлхийн нийт ашиг өнгөрсөн онд 125 хувиар өссөн бол Хятад дахь орлого нь 1.09 тэрбум доллараас давж, 2023 оныхоос 34 хувиар өсчээ.