ОХУ зургадугаар сарын 2-ны Даваа гаригт Туркийн Истанбул хотод Украинтай энхийн хэлэлцээний шинэ үе шатыг эхлүүлэх санал тавьсан билээ. Гадаад хэргийн сайд Сергей Лавров өнгөрсөн Лхагва гаригт /2025.05.28/ мэдэгдэл хийхдээ "Энх тайвныг хоосон ярих бус чин сэтгэлээсээ хүсч буй хэн бүхэн Орос, Украины энхийн хэлэлцээний шинэ үе шатыг Истанбулд хийхийг дэмжинэ гэдэгт итгэж байна" гэжээ.

Тэгвэл Украины Гадаад хэргийн сайд Андрей Сыбиха Баасан гаригт мэдэгдэл хийхдээ Оросын санал болгож буй хэлэлцээнд Украин оролцоно гэх баталгаа өгсөнгүй. Харин "Кремль дайныг зогсоохыг чин сэтгэлээсээ хүсч байна гэсэн баталгаа бидэнд хэрэгтэй. Дараагийн төлөвлөсөн уулзалтыг бодитой, утга учиртай болгохын тулд Оросын саналыг тусгасан баримт бичиг байх хэрэгтэй. Украин ийм баримт бичгийг одоогоор хүлээж аваагүй байна" гэжээ.

Мөн "Бид энэ жил энэ дайныг дуусгахыг хүсч байна. Эвлэрлийн гэрээг 30 хоног ч бай, 50 хоног ч бай, 100 хоног ч бай хугацаагаар байгуулах сонирхолтой байна" гэсэн юм.

Орос, Украины талууд тавдугаар сарын 16-нд Истанбулд уулзсан боловч амжилт олоогүй. Сүүлийн гурван жилийн хугацаанд анх удаа болсон уг хэлэлцээ хоёр цаг орчим үргэлжилсэн юм. Талууд энэ үед хоригдол солилцох тохиролцоонд хүрснээс гадна энх тайвны боломжит замын зураглалыг тодорхойлсон баримт бичгүүдийг солилцох болсон билээ.