Украинд тулалдсан хойд солонгос цэргүүдийн төлөө Кремль талархлаа илэрхийлж, Пёньянд агаарын довтолгооноос хамгаалах дэвшилтэт систем илгээжээ. ОХУ өнгөрсөн оноос хойш Хойд Солонгост хэд хэдэн удаа цэргийн техник хэрэгслийн тусламж илгээсэн. Үүнд "Панцир" агаарын довтолгооноос хамгаалах хөдөлгөөнт систем, электрон байлдааны систем зэрэг багтана.

Агаарын довтолгооноос хамгаалах дэвшилтэт систем илгээсэн нь олон улсын хориг арга хэмжээг зөрчсөн үйлдэл. Цаашилбал, өнгөрсөн оны зургадугаар сард байгуулсан Стратегийн түншлэлийн гэрээнээс хойш хоёр улсын цэргийн харилцаа улам гүнзгийрч буйн илрэл.

НҮБ өнгөрсөн онд Хойд Солонгосын эсрэг авсан хориг арга хэмжээний хэрэгжилтийг хянахын тулд Олон талт хориг арга хэмжээний хяналтын баг байгуулсан.

Тус багийн тайлагнаснаар Хойд Солонгосоос ОХУ-д мэдээлэл нийлүүлсний хариуд Москва зэвсэглэлийн хүчин чадлыг нь сайжруулахад тусалжээ. 2023 оны есдүгээр сараас хойш Хойд Солонгос улс Орост 20 мянга гаруй чингэлэг зэвсэг илгээжээ. Тээвэрлэлтэд есөн сая сум, 100 гаруй баллистик пуужин, 200 гаруй хүнд их бууны сум, танк эсэргүүцэгч пуужин, пуужин зэрэг багтсан байна. Эдгээр нь гурван бригадыг бүрэн тоноглохуйц зэвсэг юм.

Зэвсэг сумнаас гадна олны мэдэж байгаачлан Хойд Солонгос улс 11 мянга гаруй цэргээ 2024 онд Украинд илгээсэн билээ. Дараа нь 3000 цэрэг нэмэлтээр илгээсэн гэх мэдээлэл бий.

Цэргүүдээс гадна барилга, технологи зэрэг янз бүрийн салбарт ажиллуулахаар 8000 иргэнээ Орост илгээжээ. Энэ нь мөн л хойд солонгосчуудыг хилийн чанадад ажиллуулахыг хориглосон хоригийг зөрчсөн үйлдэл юм.

Тэгвэл ОХУ өнгөрсөн оны 3-10 дугаар сарын хооронд Хойд Солонгост сая баррель түлш нийлүүлжээ. Хойд Солонгосын жилийн импортын дээд хэмжээг 500 мянган баррелиар тогтоосон гэхээр энэ нь мөн л хориг зөрчсөн үйлдэл болжээ.