НЭМЭЛТ: 

“Огцрох амархан” жагсаалыг зохион байгуулагч нарын төлөөлөлтэй өнөөдөр УИХ-ын дарга Д.Амарбаясгалан уулзсан юм. Уулзалтаар талууд юу ярилцсан, ямар асуудлыг анхаарч ажиллах болсон талаарх мэдээллийг УИХ-ын Төрийн байгуулалтын байнгын хорооны дарга Ж.Бат-Эрдэнэ дараах мэдээллийг хийлээ.

УИХ-ын Төрийн байгуулалтын байнгын хорооны дарга Ж.Бат-Эрдэнэ:

-Сүхбаатарын талбайд жагсаал хийж байгаа залуучууд мааань УИХ-ын даргад уулзах санал тавьсан. Дөрвөн залуу уулзалтад оролцлоо.  УИХ-ын зүгээс УИХ-ын дарга Д.Амарбаясгалан болон парламентад сонгогдсон таван нам, эвслийн төлөөлөл уулзалтад оролцож, УИХ хяналтын систем хэрхэн ажиллаж байгаа , УИХ ямар бодлого барьж байгаа талаар мэдээлэл өглөө.

Залуучууд нэгдүгээрт, Ерөнхий сайдад ёс зүйн талаас ямар арга хэмжээ авч болох юм, өөрийнх нь орлогыг нотлох талаас ямар үйлдлүүд хийх ёстой вэ гэдэг асуудал тавилаа.

Хоёрдугаарт, Ерөнхий сайдад итгэл үзүүлэх эсэх асуудлыгУИХ ямар горимоор хэлэлцэх юм гэдгийг тодрууллаа.  Гуравдугаарт, Ерөнхийлөгчийн засаглал бий болгох асуудал яригдаж байна. Энэ хүрээнд Үндсэн хуульд өөрчлөлт оруулах ч юм уу ямар нэгэн  байдлаар Ерөнхийлөгчийн засаглал руу оръё гэдэг асуудал парламентад байгаа юу гэдэг асуудлыг тавьж энэ сэдвийн хүрээнд ярилцлаа.

Ерөнхий сайдад итгэл үзүүлэх эсэх тогтоолын төсөл УИХ-д ирсэн байгаа. Энэ тогтоолын төслийг танилцууллаа.  УИХ энэ асуудлыг ирэх долоо хоногийн Даваа гаригаас УИХ-ын Төрийн байгуулалтын байнгын хорооны хуралдаанаар хэлэлцээд эхэлнэ.  УИХ-ын чуулганы нэгдсэн чуулган Пүрэв гаригт хуралддаг, урагш татаад хэлэлцээд явах бололцоотой гэдэг асуудлыг тавилаа.

Ерөнхий сайд намын дээд байгууллага Бага хурал руугаа асуудлаа дэвшүүлж ороод тэнд асуултанд хариулсан. Төрийн байгуулалтын байнгын хорооны хурадаанд Ерөнхий сайд  оролцож, асуултад хариулна, УИХ-ын чуулганы хуралдаанд 126 гишүний өмнө тайлангаа тавьж асуултад хариулна. Залуучуудын тавьсан саналд нээлттэй хариулт авах боломжтой гэдгийг хэллээ.

УИХ Үндсэн хуульд өөрчлөлт оруулъя гэдэг бодол байхгүй, парламентын засаглалаа төгөлдөржүүлэх, ардчилсан үзэл санааг бий болгох тал дээр улам ажиллах ёстой гэдгээ хэлсэн. УИХ-ын сонгуулийн тухай хуульд холимог тогтолцоог бий болгосноор таван намын төлөөлөлтэй 126 гишүүнтэй болсон. Ерөнхийлөгчийн засаглалыг дэмжих бодлого УИХ барихгүй байгаа гэдгээ хэллээ.

Мөн залуучууд маань аюулгүй байдлыг хангах асуудлыг тавьсан. Хууль зүйн байнгын хороо болон хуулийн байгууллагад асуудлыг тавъя. Маргаашнаас эхлээд тодорхой асуудлууд дээр нь дарамт шахалт юу байсан юм, чөлөөтэй үгээ хэлэх болможоор хангаж байна уу гэдэг дээр ХЗБХ-ны гишүүдийг явуулаад ажиллуулъя гэдэг санал хэлсэн.

УИХ-ын дарга “Огцрох амархан” жагсаалд оролцогчидтой уулзана

УИХ-ын дарга Д.Амарбаясгалан өнөөдөр 16:30 цагт “Огцрох амархан” жагсаалд оролцогчидтой уулзахаар болжээ. Ерөнхий сайд Л.Оюун-Эрдэнийн хүүгийн тансаглалыг эсэргүүцсэн залуус хөрөнгө орлогоо нотлохыг шаардан Сүхбаатарын талбайд жагсаж эхэлснээс хойш 15 хонож буй.

Энэ хугацаанд жагсагчидтай УИХ дахь Ардчилсан намын бүлгийн гишүүд уулзсан. Тэгвэл энэ удаад УИХ-ын дарга уулзахаар болжээ. Уулзалт Төрийн ордонд УИХ-ын даргын өрөөнд болох аж.