ОХУ-ын ерөнхийлөгч Владимир Путины бага охин Катерина Тихоноватай холбоотой гэгддэг нисгэгчгүй нисэх онгоц үйлдвэрлэгч "Geoscan" компани сурагчдад зориулсан анхны сурах бичгээ хэвлүүлжээ. Нисгэгчгүй нисэх онгоц ажиллуулах тухай уг сурах бичгийг Оросын найм, есдүгээр ангийн сурагчид ашиглана. Энэ нь төрийн хяналт шалгалтад тэнцсэн нисгэгчгүй нисэх онгоцны системийн тухай анхны сурах бичиг болж байна.

Сурах бичгийг Оросын Холбооны сурах бичгийн хөтөлбөрт нэмж оруулсан бөгөөд технологийн хичээлийн нэг хэсэг болгон хүүхдүүдэд заах юм.

"Geoscan" компанийн Боловсролын төслийн захирал Михаил Луцкий хэлэхдээ "Бид нисгэгчгүй нисэх онгоц хөгжүүлсэн 14 жилийн туршлага, сургалтын робот хөгжүүлсэн найман жилийн туршлагадаа үндэслэн энэ сурах бичгийг бүтээлээ. Энд хоосон онол огт байхгүй. Харин ч ойлгомжтой, ашиглахад бэлэн материал" гэжээ.

Сурах бичгийг Оросын хамгийн том сурах бичиг хэвлэлийн газар "Просвещенье" 2024 онд хэвлэн гаргажээ. Улмаар тус улсын Боловсролын яам өнгөрсөн сард сургалтад ашиглах зөвшөөрлийг олгосон байна.

Путины бага охин Катерина Тихонова 2023 оны арваннэгдүгээр сард "Geoscan" компанийн хувьцааны 10 хувийг худалдаж авчээ. "Geoscan" нь АНУ-ын хоригт багтсан компани юм.

ОХУ 2030 он гэхэд улс даяарх 500 гаруй сургууль, 30 их сургуульд нисгэгчгүй нисэх онгоцны нэг сая мэргэжилтэн бэлтгэх амбицтай зорилт тавьсан. Энэ зорилтод хүрэх төлөвлөгөөний нэг хэсэг нь энэхүү сурах бичиг болж байна. Москва, Санкт Петербургийн их сургуулиудын 30 мянга орчим оюутан 2023 оноос нисгэгчгүй нисэх онгоцтой ажиллах сургалтад хамрагдаж эхэлжээ.