Хууль зүй, дотоод хэргийн сайд О.Алтангэрэлээс өнөөдөр /2025.05.28/ хамтарсан Засгийн газрын талаар тодрууллаа.

Тэрбээр "Засгийн газрын хурал дээр үүссэн нөхцөл байдлын талаар ярилцлаа. Бүх сайдууд үгээ хэлж, өнгөрсөн хугацаанд хийж хэрэгжүүлсэн ажил, цаашдаа юун дээр анхаарах талаараа ярилцсан. Ерөнхий сайдын хувьд сайд нарынхаа санаа бодлын сайн сонсч байх шиг байна. Үг хэлж, үзэл бодлоо илэрхийлж байгаа сайд нарын хувьд хамтарсан Засгийн газар үр дүнтэй ажиллаж, олон том төслүүдийн ард гарч, хийх хэрэгжүүлэх төслүүдээ эрч хүчтэйгээр ажилласан гэдгээ ярилцлаа. УИХ руу итгэл үзүүлэх эсэх асуудлаар тогтоолын төсөл оруулах нь цэвэр Ерөнхий сайдын бүрэн эрхийн асуудал байдаг. Энэ дээр төсөл нь ямар томъёололтой вэ гэдэг мэдээлэл алга. Ардчилсан намын дарга Л.Гантөмөрийн хувьд хамтарсан Засгийн газарт Ардчилсан намаас томилогдсон найман сайд өөрсдөө чөлөөлөгдөх өргөдлөө бичнэ. Тэр төслийг нь бэлдэх даалгаврыг надад өгсөн. Би бэлдээд байж байна. Бүгдээрээ гарын үсгээ зурна.

Бид бүлгийнхээ шийдвэрийг дагана. Угаасаа бид Засгийн газарт хамтрахдаа Үндэсний бодлогын хороо, Улс төрийн зөвлөл, бүлгийн хурлаар шийдвэр гаргасан. Одоо ч бүлгийн шийдвэрээ дагана. Ерөнхий сайдад итгэл үзүүлсэн ч бай, үзүүлээгүй ч бай хамтарсан Засгийн газраас Ардчилсан нам гарна.

Ардчилсан намаас томилогдсон найман сайд хариуцлагатайгаар ажиллаж байхад МАН-аас гэрээгээ зөрчсөн гэж дүгнэсэн. Бид гэрээний үүргээ зөрчсөн гэж үзэхгүй байгаа. Тиймээс улс төрийн соёлын хувьд өөрсдөө өргөдлөө өгөх нь зүйтэй. Найман сайд хичээж ажилласан. УИХ дээр Засгийн газартай холбоотой ямар ч шийдвэрийн төсөл, санал байхгүй. Нийгэм олон асуудал явж байна. Гэхдээ албан ёсоор УИХ ямар асуудал хэлэлцэх нь хуулийн нарийн зохицуулалттай. Энгийн үгээр хэлэхэд УИХ дээр ямар ч цаас байхгүй. Гэхдээ Ерөнхий сайд итгэл үзүүлэх асуудлаар тогтоолын төсөл оруулах гэж байна гэж ойлгосон. Үүн дээр нам, эвслийн бүлгүүд дотооддоо шийдвэрээ гаргаад явна. Хувь хүнийхээ хувьд бүлгийнхээ шийдвэрийг 100 хувь дагана. Ерөнхий сайд бүлгийн хурал дээр мэдээлэл өгөх ёстой. Өөрөө тайлбар хийх ёстой. Бид өргөдлөө өгнө. Танхимаа яаж бүрдүүлэх нь Ерөнхий сайдын бүрэн эрхийн асуудал өөр хэн ч тайлбар өгөх боломжгүй. Бидний байр суурь маш тодорхой байгаа" гэв.