ОХУ-ын хууль тогтоогчид тавдугаар сарын 26-ны Даваа гаригт барууны хүүхэлдэйн кино, тоглоом, видео тоглоом зэргийн талаар дугуй ширээний хэлэлцүүлэг өрнүүлжээ. Шрек зэрэг үлгэрийн баатар нь орос хүүхдүүдэд сөргөөр нөлөөлж байна гэж тэд үзэж байна.

"Тэд тийм муу биш байж болох ч харагдах байдал, зан чанарын хувьд асуудалтай. Барууны соёлд аажим аажмаар нэвтрэхийн хэрээр сөрөг шинж чанарыг агуулсан дүрүүд гарч ирж эхэлсэн. Гэсэн хэрнээ эерэг дүрийн статустай. Үнэхээр цэвэр эерэг дүрүүд бүдгэрч эхэлжээ" гэж Төрийн думын депутат Яна Лантратова хэлжээ.

Тэрбээр хууль тогтоогчдод илтгэлээ танилцуулахдаа Шрек, Гринч болон “Monsters” киноны баатруудыг Зөвлөлтийн үеийн кино, тоглоомын эерэг сайн дүрүүдтэй харьцуулжээ.

Түүнчлэн "Шударга Орос" намын дарга Сергей Миронов барууныхныг Оросын эсрэг хайбрид дайн зарласан гэж буруутгав. Барууны засгийн газрууд "Дайснаа ялъя гэвэл хүүхдийг нь хүмүүжүүл" гэсэн аргыг идэвхтэйгээр ашиглаж байна гэж тэр үзжээ.

ОХУ-д тодорхой хууль тогтоомж байхгүй байгаа учраас хүүхдэд зориулсан барууны контентуудыг хориглож чадахгүй байна гэж тэд дүгнэв. Тиймээс Оросын уламжлалт оюун санааны үнэт зүйлсийг хадгалахад чиглэсэн арга хэмжээний талаар доод танхимын ажлын хэсэгтэй хэлэлцүүлэг өрнүүлэхээр төлөвлөжээ.