АНУ-ын ерөнхийлөгч Дональд Трамп сүүлийн үед Путинд хандаж цөөнгүй шүүмжлэл хэлсэн. Тэгвэл түүний хатуу үгсийн цуваа Мягмар гаригт "Truth Social"-д дахин үргэлжлэв.

Тэрбээр "Хэрвээ би байгаагүй бол Орост маш их муу зүйл тохиолдох байсан. Маш муу шүү. Үүнийг Владимир Путин ойлгохгүй байна. Тэр галаар тоглож байна" гэжээ.

Маш муу зүйл гэдгээрээ чухам юуг хэлж байгаагаа тэр тодруулсангүй. Мөн ямар нэгэн заналхийлэл ч хэлээгүй. Гэхдээ түүнийг ойрын хугацаанд ОХУ-ын эсрэг шинэ хориг арга хэмжээ авч магадгүй байгааг зарим хэвлэл таамаглаж байна. Ням гаригт тэр сэтгүүлчдэд мэдээлэл өгөхдөө "ОХУ-ын эсрэг хориг арга хэмжээг чангалах талаар бодож байгаа" гэж байв.

Трамп өмнө нь Путиныг шүүмжилдэггүй, харин ч түүнийг байнга бахархаж ярьдаг байв. Гэтэл сүүлийн үеийн мэдэгдүүдийг нь харахад түүний байр суурь өөрчлөгдөж эхэлсэн бололтой.

Тэрбээр Ням гаригийн шөнө цахим хуудсандаа "Би Владимир Путинтэй үргэлж л сайхан харилцаатай байсаар ирсэн. Гэвч түүнд ямар нэг зүйл тохиолдчихоод байна. Тэр үнэхээр галзуурчээ. Путин шаардлагагүйгээр олон хүний амийг хороож байна. Путин Украиныг бүхэлд нь эзлэхийг хүсвэл энэ нь Оросыг сүйрүүлэх болно" гэсэн юм.

Түүнчлэн мөн өдөр сэтгүүлчдэд мэдээлэл өгөхдөө "Путины үйл хөдлөл таалагдахгүй байна. Тэр маш олон хүний аминд хүрч байна. Путинд ямар чөтгөр нь тохиолдчихоод байгааг ойлгохгүй байна. Би түүнийг эртнээс мэднэ, түүнтэй үргэлж хамт байсан. Гэхдээ хотууд руу пуужин илгээж, хүмүүсийг хөнөөж байгаа нь огт таалагдахгүй байна" гэжээ.