Монгол Улсын Ерөнхий сайд Л.Оюун-Эрдэнийг огцрохыг шаардсан "Огцрох амархан" жагсаал өнөөдөр /2025.05.27/ 14 дэх өдрөө үргэлжилнэ. Энэ хугацаанд 150 мянга орчим иргэн түүнийг огцрохыг дэмжин гарын үсгээ зураад байна.

Тэгвэл "Огцрох амархан" жагсаалыг олон улсын зарим хэвлэл доорх байдлаар онцолжээ: 

Associated Press: 

Ерөнхий сайдыг огцрохыг шаардсан эсэргүүцлийн жагсаал үргэлжилсээр, байгуулагдаад 10 сар болж буй Монгол Улсын хамтарсан Засгийн газар тарах дээрээ тулав бололтой. Хамтарсан засгийн газрын хамгийн том нам болох Монгол ардын нам хоёр дахь том намаа эвслээс гаргахаар шийдсэн. Үүнээс нэг өдрийн дараа эрх баригч гурван намын дарга нар эвслийн гэрээгээ дүгнэхээр хуралдсан юм.

Ерөнхий сайд Л.Оюун-Эрдэнийг огцруулах саналыг Ардчилсан намын зарим залуу гишүүн дэмжсэн тул Монгол ардын нам Ардчилсан намыг гэрээгээ зөрчсөн гэж буруутгажээ.

Харин Ардчилсан намын дарга Л.Гантөмөр тэдний байр суурь бол намын байр суурь биш гэдгийг хэлсэн байна. Тэрбээр "Гэрээнд би гишүүдийнхээ амыг барина гэж гарын үсэг зураагүй. Би намынхаа араншинг мэднэ шүү дээ" гэжээ.

Л.Оюун-Эрдэнэ Ерөнхий сайдын албыг дөрвөн жил хашсан бөгөөд өмнө нь ч огцрох уриалгатай тулгарч байв. Түүний хүүгийн тансаг хэрэглээтэй холбоотой мэдээлэл эсэргүүцлийн жагсаалыг өдөөсөн юм. Албан тушаалтнууд болон тэдний гэр бүлийнхэнтэй холбоотой авлигын асуудал жагсагчдын дийлэнх олонхийг бүрдүүлж буй залуусын дунд эртнээс яригдсаар ирсэн. Энэ удаагийн мэдээлэл тэдний гомдлыг чинээнд нь тулгажээ.

Жагсагч 45 настай О.Ариунбилэг гурван хүүхдийн ээж. О.Ариунбилэг эрх мэдэлтнүүд, тэр дундаа Ерөнхий сайдын хүүгийн хөрөнгө чинээг жигшсэн учир жагсаалд анхнаас нь оролцжээ. Тэрбээр "Ерөнхий сайдын авлигатай тэмцэнэ гэсэн амлалт нь худал бөгөөд хоосон зүйл" гэв.

Жагсагч 26 настай Б.Пүрэвнамжил албан тушаалын гэмт хэргээс урьдчилан сэргийлэхийн тулд улс төрийн тогтолцоог өөрчлөх ёстой гэж үзэж байна. Тэрбээр "Ерөнхий сайд ажлаа аваад зургаан жил болж байгаа ч юу ч өөрчлөгдөөгүй. Жагсагчдын олонх нь залуус байна, тэд аль ч улс төрийн намд харьяалагддаггүй" гэжээ.

Монгол бол далайд гарцгүй, Хятад, Оросын дунд оршдог, байгалийн баялаг ихтэй, 3.5 сая хүн амтай улс. Иргэдийнх нь тал хувь нийслэлдээ амьдардаг. Хүйтэн дайны үед коммунист улс байсан Монгол ЗХУ задран унасны дараа ардчилалд шилжсэн. Жагсагчдын үзэж буйгаар Монголын ашигт малтмалын баялаг чинээлэг хүмүүсийн ашиг сонирхолд л нийцэж байна. Эсрэгээрээ олон монголчууд ядуу хэвээр.

Agence France-Presse:

Далайд гарцгүй ардчилсан нийгэмд олон жил бугшсан авлигын хэргээс үүдэлтэйгээр Ерөнхий сайдаа огцрохыг шаардан олон зуун монгол залуус нийслэлд жагсч байна. Монгол Улс авлигатай олон 10 жил тэмцэж буй бөгөөд нүүрс олборлолтоос олсон орлогыг чинээлэг давхаргынхан эзэмшиж байна гэх өргөн тархсан ойлголт нь эсэргүүцлийн жагсаал, эмх замбараагүй байдал үүсгэсээр иржээ.

Ерөнхий сайд Л.Оюун-Эрдэнийн үед "Транспаренси интернэшнл" байгууллагаас гаргадаг авлигын төсөөллийн индексээр Монгол Улсын оноо огцом унасан.

Ерөнхий сайдын гэр бүл төрийн албан хаагчийн хэрэглээнээс хавьгүй хол давсан баялаг эдэлж байна гэх мэдээлэл олны дургүйцлийг төрүүлж байна. Түүний хүүгийн найз бүсгүй төрсөн өдрөөрөө авсан тансаг бэлгээ цахим сүлжээндээ нийтэлсэн нь олныг улам өдөөн хатгасан юм.

Гэвч Ерөнхий сайдын ажлын алба "AFP" агентлагт мэдээлэл өгөхдөө үүнийг гүтгэлэг гэж няцаажээ. Харин жагсаалыг зохион байгуулагч О.Уламсайхан тус хэвлэлд "Ерөнхий сайд огцрох ёстой. Бидний зорилго бол төрийн албан хаагчдын ёс зүйгүй үйлдэлд хариуцлага тооцох, тэднийг огцруулдаг улс төрийн шинэ соёлыг бий болгох явдал" гэх мэдээллийг өгч байна.

Өдгөө залуучууд голдуу олон зуун иргэн Сүхбаатарын талбайд Ерөнхий сайдыг огцрохыг шаардан жагссаар байна.

Үүний зэрэгцээ эдийн засаг, амьжиргааны өртөгтэй холбоотой санаа зоволт иргэдийн уур бухимдлыг улам нэмж байна. ОХУ-аас Украинд түрэмгийлсний дараа Монголын инфляци өссөөр, өнгөрсөн онд есөн хувьд хүрчээ.

Жагсагч О.Хулан 19 настай, их сургуулийн оюутан. Тэрбээр "Залуус амьдралаа залгуулах гэж шаргуу хөдөлмөрлөж байна. Би трифт дэлгүүрээс цүнх авч байхад Ерөнхий сайдын хүү, бэр хоёр тансаг амьдралтай байгаа нь шударга бус санагдлаа. Залуус бол Монголын ирээдүй. Бид илүү сайн сайхны төлөө тэмцэх ёстой. Тийм ч учраас би жагсаалд нэгдсэн" гэжээ.

Харин Ерөнхий сайдын хэвлэлийн төлөөлөгч "Хүн бүр хуулийн өмнө эрх тэгш байж, орлогоо нотолдог байх ёстой. Засгийн газар авлигатай тэмцэх ажлыг эрчимжүүлж, асар их байгалийн баялгаас орж ирсэн орлогыг тэгш хуваарилахаар хичээж байна" гэлээ.

Дашрамд дурдахад, ахимаг насныхан Ерөнхий сайдыг огцруулахыг дэмжихгүй байгаагаа илэрхийлэн жагсч байна. Ерөнхий сайдыг огцрууллаа гээд юм өөрчлөгдөнө гэж тэд бодохгүй байна. Тухайлбал, 65 настай Д.Магсаржав "Залуучууд Ерөнхий сайдыг огцрохыг шаардаж байна. Тэгээд дараа нь яах вэ гэсэн асуулт гарч ирнэ. Дараагийн ерөнхий сайдад тохирох илүү сайн нэр дэвшигч байхгүй гэж бодож байна" гэжээ.