Владимир Путины Курск дахь айлчлалын үеэр түүний нисдэг тэрэг нисгэгчгүй нисэх онгоцны халдлагатай таарчээ. Ерөнхийлөгч дотор нь байхад тус нисгэгчгүй нисэх онгоцыг буудаж унагаасан гэж Оросын албан тушаалтан хэлэв.

Агаарын довтолгооноос хамгаалах хүчний командлагч, хошууч генерал Юрий Дашкин төрийн мэдлийн "Rossiya-24" телевизэд мэдээлэл өгөхдөө "Путины онгоц Украины нисгэгчгүй нисэх онгоцны дайралтын дунд орсон тул агаарын тулаанд оролцсон. Ерөнхийлөгч өнгөрсөн долоо хоногт Курск мужид айлчлах үеэр энэ хэрэг болсон. Бид агаарын довтолгооноос хамгаалах тулаан хийж, ерөнхийлөгчийн нисдэг тэрэгний нислэгийн аюулгүй байдлыг хангасан. Ажиллагааны үеэр Украины өөр хэд хэдэн нисгэгчгүй онгоцыг устгасан. Даалгавар биелсэн. Дайсны нисгэгчгүй онгоцнуудын довтолгоог няцааж, агаарын бүх байг оносон" гэжээ.

Путиныг Зөвлөлтийн үеийн Ми-8 онгоцны сайжруулсан хувилбар болох Ми-17 нисдэг тэргээр зорчиж явсан гэж таамаглаж байна. Ми-17 нь ойролцоогоор 25 метр урт бөгөөд 30 зорчигч юм уу дөрвөн тонн ачаа тээвэрлэх чадалтай. Мөн хэт ягаан туяа саатуулагч, галт төөрүүлэгч төхөөрөмж, хуягт бүрхүүл зэргээр тоноглогджээ. Гэсэн хэдий ч зохион байгуулалттай нисгэгчгүй онгоцны халдлагын үеэр нисдэг тэрэгний хамгаалалтын систем төдийлөн хүчтэй байдаггүй тул дагалдан яваа бусад онгоц болон газрын хамгаалалт шаардлагатай байдаг.

Украины талаас энэ тухай мэдэгдэл хийгээгүй байна. Хэрвээ халдлага үнэхээр Путины айлчлалтай давхацсан бол Украины тал ерөнхийлөгчийн маршрутын талаар нарийн мэдээлэлтэй байсан гэж үзэв. Цаашилбал, дайн эхэлснээс хойш Путины аминд халдахыг завдсан шууд оролдлогуудын нэг болох юм. Фронтын шугамд үе үе айлчилдаг Зеленскийтэй харьцуулахад Путин дайны бүсэд ховорхон очдог.