шийдвэрийг биелүүлэхгүй зоргоороо аашилдаг газар манайд олон бий.
Үүний тод жишээг сүүлийн үед “Цаст Констракшн”-ынхан баталж өгөв. Тус
компани нийслэлийн Сүхбаатар дүүргийн III хорооны нутаг дэвсгэрт 30
айлын орон сууцны барилга барьж байгаа. Барилга барьж буй талбай нь
“Монгол эм импекс”, “Монгол глобал” компаниудын эзэмшлийн дунд байдаг
1458 ам.метр газар. Харин тэд хууль журмын дагуу үйл ажиллагаагаа
явуулахын оронд зэргэлдээ компаниудынхаа газраас хумсалж, хохирол
учруулсаар байгаа. Үүнээс үүдэн дээрх компаниуд “гурван талт” газрын
маргааныг үүсгэж, одоог хүртэл шийдэлд хүрч чадахгүй явсаар байгаа
талаар манай сонин өмнө нь сурвалжлан уншигчдадаа хүргэж байсан
билээ. “Цаст констракшн” компанийн “Монгол эм импекс”, Монгол
глобал” компаниудын эд хөрөнгөд хохирол учруулсаныг холбогдох
байгууллагууд нь шалгаж нийт арван сая төгрөгөөр торгохоор болсон.
Гэтэл тэд торгуулийн мөнгөө өгөх нь битгий хэл дахин хохирол
учруулсаар байгаа аж. Мөн “Цаст констракшн” ХХК-ыг барилга барих
зөвшөөрлийг Нийслэлийн Засаг Дарга бөгөөд Улаанбаатар хотын захирагч
Г.Мөнхбаяр цуцалсан. Өнгөрсөн наймдугаар сарын 12-ны өдөр Захиргааны
Хэргийн шүүгчийн шийдвэр гарч гурван талын маргаан шийдвэрлэгдэж
дуустал барилгын ажлыг үргэлжлүүлж болохгүй гэсэн шийдвэрийг
гаргажээ. Гэтэл “Цаст констракшн” ХХК ажлаа үргэлжлүүлсэн хэвээр л
байна. Тиймээс холбогдох албаны хүмүүсээс Захиргааны хэргийн шүүгчийн
шийдвэр яагаад биелэхгүй байгаа талаар тодруулсан юм.
МХЕГ-ын Дэд бүтцийн хяналтын газрын дарга Ц.Ганбат:
-Захиргааны хэргийн шүүгчийн шийдвэрт гурван талын маргаан
шийдвэрлэгдэж дуустал “Цаст констракшн” компанийг барилгаа
барихыг хориглосон шийдвэр гарсан байсан. Нийслэлийн шийдвэр гүйцэтгэх
албанаас НМХГ-т барилгын ажлыг зогсоох талаар өнгөрсөн наймдугаар
сарын 25-ны өдөр мэдэгдэх хуудас хүргүүлсэн байна. Гэсэн ч тус компани
барилгаа үргэлжлүүлэн барьсаар л байна. Үүнд та ямар хариу өгөх вэ?
-Анх “Цаст костракшн”-ынхан барилга барих зөвшөөрөл авсны үндсэн дээр
үйл ажиллагаагаа эхлүүлсэн юм билээ. Сүүлд нь зөвшөөрөл нь хүчингүй
болчихоод дээрх асуудлууд үүссэн. Одоо энэ асуудал шүүхээр
шийдвэрлүүлэх шатанд явж байгаа. Тиймээс бид оролцох эрх байхгүй.
-Танай байгууллагыг хяналт тавь гэж албан бичиг хүргүүлсэн гэсэн шүү дээ?
-Энэ талаар мэдэх юм алга.
Төрийн нэг байгууллага нь үүрэг өгсөн, нөгөө нь мэдэхгүй гээд л сууцгааж
байна. Шүүхийн шийдвэр гарах хүртэлх хугацаанд барилга үргэлжлүүлэн
барихыг нь хориглосоор байхад мэргэжлийн байгууллага нь ч иймэрхүү
хариулт өгч, хариуцагч тал нь ч барилгаа үргэлжлүүлэн барьсаар байх юм.
Замын цагдаагийн газрын Замын зохион байгуулалтын тасгийн дарга, цагдаагийн хурандаа М.Ариунболд:
-“Цаст констракшн”-ы барилга барьж буй талбайд барилгын материал
ачсан машин оруулахыг хориглох тухай албан бичиг замын цагдаагийн
газраас хүргүүлсэн. Гэсэн ч тухайн компани барилгаа үргэлжлүүлэн
барьсаар байгаа нь танай шийдвэрийг биелүүлэхгүй байгааг нотолж
байгаа юм биш үү?
-Манай зүгээс наймдугаар сард шаардлага хүргүүлсэн. Гэхдээ машин орж
гарч байгааг нь байнга харж зогсох боломж, бололцоо байхгүй. Харин
хажууд нь үйл ажиллагаа явуулдаг “Монгол Глобал”, “Монгол эм импекс”
компанид шаардлага зөрчсөн үйл явдал гаргавал мэдэгдэхийг хүссэн.
-Тэгээд энэ талаар мэдэгдсэн тохиолдол гарсан уу?
-Шаардлага хүргүүлснээс өнөөдрийг хүртэлх хугацаанд хоёр ч удаа барлигын
материал ачсан машин орсныг мэдэгдсэн. Тохиолдол бүрт нь 30 мянган
төгрөгөөр “Цаст констракш”-ныг торгож, машиныг нь журамласан.
-Дахиад ийм үйлдэл давтагдвал яах вэ?
-Дээрх арга хэмжээг дахин авна.
“Улаанбаатар дулааны шугам сүлжээ” төрийн өмчит хувьцаат компанийн дэд захирал Г.Баярсайхан:
-Танай байгууллага дулааны шугам сүлжээн дээр барилга барьж байгаа
“Цаст констракшн”-ыг орон сууц барьж болно гэсэн атлаа хажуу дахь
жижигхэн гражыг нь нураах сануулга өгсөн байна билээ?
-Бидний зүгээс “Цаст констракшн”-д барилга барьж болно гэсэн зөвшөөрөл
өгөөгүй. Хэрэв тухайн газарт барилга барих юм бол Сүхбаатар дүүргийн
дулаан, усны шугамуудад засвар, үйлчилгээ хийхэд хэцүү болох
магадлалтай. Тиймээс тэр хавийн шугаман дээр байгаа барилгуудыг буулгах
мэдэгдэл өдөр болгон л хүргүүлж байгаа. Гэсэн ч мэдэгдлийг хүлээж
авахгүй л байна.
-Хүлээж авахгүй байгаа газруудад ямар хариуцлага тооцох ёстой юм бэ?
– Шүүхийн шийдвэр гартал мэдэгдлүүдээ өдөр болгон л хүргүүлж байна.
Холбогдох газрууд нь бүгд л хүлээлтийн байдалд шилжжээ. “Тэд шүүхээс
ямар шийдвэр гарахыг хүлээж суухаас өөр аргагүйд хүрсэн юм байж. Харин
энэ тайван байдлыг далимдуулан Цастынхан барилгаа дуусгахаар, ядаж рамыг
нь зангидхаар шуурхайлан хөдөлж эхэлсэн. Хэрэв ингэж чадах аваас
шүүхийн шийдвэр тэдний талд гарах нь дамжиггүй” гэж ярих хүмүүс цөөнгүй
байна. Тэдний хэлснээр ердөө торгууль мэтийн арга хэмжээ авах нь
томоохон компанийн хувьд юу ч биш учир торгуулийг нь төлөөд барилгаа
дуусгахаар шаргуу хөөцөлдөж эхэлсэн бололтой.
Р.САРАНГОО
Зохиогчийн эрх:
"Улс төрийн тойм" сонин