Ерөнхийлөгч У.Хүрэлсүхийн урилгаар төрийн айлчлал хийх Австри Улсын Ерөнхийлөгч Александр Ван дер Беллен өчигдөр/2025.05.25/ Монгол Улсад ирсэн. Тэгвэл түүнийг Монгол Улсын Ерөнхийлөгч У.Хүрэлсүх төв талбайд 10:00 цагаас албан ёсоор угтаж авах юм. Австри Улсын Ерөнхийлөгчийн анх удаа Монгол Улсад хийх тус айлчлалын үеэр хоёр улсын Ерөнхийлөгч албан ёсны хэлэлцээ хийж, Монгол-Австрийн Хамтарсан тунхаглалыг байгуулах юм.

Түүнчлэн айлчлалын бүрэлдэхүүнд Австрийн талаас соёл, урлаг, шинжлэх ухаан, бизнесийн салбарын төлөөлөл багтсан байна.

Тухайлбал, Австрийн хөгжмийн удирдаач, төгөлдөр хуурч, Маттиас Флецбергер 2025 оны тавдугаар сарын 18-28-ны өдрүүдэд Монголд айлчлан ирж, монгол уран бүтээлчидтай хамтран ажиллаж, “Сонгодог үдэш” тоглолтыг өнөөдөр УДБЭТ-д толилуулах юм.

Монгол Улс, Австри Улс 1963 оны долдугаар сарын 01-ний өдөр дипломат харилцаа тогтоосон бөгөөд уламжлалт найрсаг харилцаа, хамтын ажиллагааг хөгжүүлж иржээ.

Хоёр улсын худалдааны эргэлтийг аваад үзвэл 2024 онд 39,53 сая ам.доллар байснаас 34,5 сая ам.долларын бараа бүтээгдэхүүн импортолж, 5,03 сая ам.долларын бараа бүтээгдэхүүн экспортолсон байна. Австри улсад 2600 гаруй Монгол иргэд оршин суудаг бөгөөд 2024 оны байдлаар 200 орчим Монгол оюутан суралцаж байгаа юм. Үүнээс Монгол Улсын Ерөнхийлөгчийн санаачилсан “Илгээлт- 2100” хөтөлбөрийн хүрээнд тус улсад 6 оюутан Леобен хотын Монтанагийн их сургуульд суралцаж байна. Энэ жил 81 настай Ерөнхийлөгч Александр Ван дер Беллен нь 2017 онд Австри Улсын Ерөнхийлөгчөөр сонгогдож байсан бол 2022 онд дахин сонгогдсон юм.

БҮГД НАЙРАМДАХ АВСТРИ УЛСЫН  ЕРӨНХИЙЛӨГЧ АЛЕКСАНДР ВАН ДЕР БЕЛЛЕН

Төрсөн огноо:        1944 оны 1 дүгээр сарын 18-ны өдөр

Төрсөн газар:         Австри Улсын Вена хотод төрж, Тирол мужид өссөн

Боловсрол:

1950 – 1962              Инсбрук хотод бүрэн дунд боловсрол

1962 – 1966              Инсбрукийн их сургуульд Эдийн засгийн ухааны бакалавр

1967 – 1970              Инсбрукийн их сургуульд Эдийн засгийн ухааны доктор

Ажил эрхэлсэн байдал:

1968 – 1975              Инсбрукийн их сургуулийн дэргэдэх Төрийн санхүүгийн хүрээлэнгийн эрдэм шинжилгээний ажилтан

1972 – 1974              Баруун Берлиний Шинжлэх ухааны төвийн Олон улсын захиргаа, удирдлагын хүрээлэнд судлаач

1976 – 1980              Инсбрукийн их сургуульд дэд профессор

1977 – 1980              Вена дахь Төрийн удирдлагын академийн зөвлөх

1980 – 2009              Венийн их сургуулийн Эдийн засгийн тэнхимийн профессор

1990 – 1994              Венийн их сургуулийн Эдийн засгийн тэнхимд дэд эрхлэгч, тэнхимийн эрхлэгч

1994 – 2012              Австри Улсын Үндэсний зөвлөлийн гишүүн

1997 – 2008              Австрийн Ногоон намын хэвлэлийн төлөөлөгч

1999 – 2008              Австрийн Үндэсний зөвлөл дэх Ногоон намын бүлгийн дарга

2012 – 2015              Вена хотын Төлөөлөгчдийн хурлын гишүүн бөгөөд Хотын зөвлөлийн гишүүн

2017.01.26-               Бүгд Найрамдах Австри Улсын Ерөнхийлөгч

Шагнал:

2004 онд                   Бүгд Найрамдах Австри Улсад оруулсан гавьяаны төлөөх Алтан одот их хүндэтгэлийн одон

Гэр бүлийн байдал: гэр бүл, 2 хүүхэдтэй