"CS"-ийн "IEM Dallas" тэмцээний аварга өнөөдөр/2025.05.25/ шөнө тодорно. Мэйжорын өмнө болж буйгаараа онцлог энэхүү тэмцээний шагналын сан 300 мянган ам.доллар бөгөөд дэлхийн шилдэг 16 багтай эхэлсэн аяллын төгсгөлд Германы "MOUZ" болон Францын "Vitality" багууд тунав.

Өчигдөр Монголын "The MongolZ" баг хагас шигшээ шатанд "MOUZ"-тай тоглож, маш өрсөлдөөнтэй тоглолтын эцэст 0-2 гэсэн харьцаатай хожигдсон билээ. Тус тоглолтын дараа "MOUZ"-ийн ахлагч "Brollan" буюу Лудвиг Бролин дараах зүйлсийг ярьжээ.

"The MongolZ" болон "MOUZ" багуудын тоглолтын үеэр цэнгэлдэх даяараа Монголын багийг дэмжиж, "MOUZ"-ийг "бүүлж" байсан юм.

-Хүнд тоглолтын эцэст "The MongolZ"-ийг хожлоо. Энэ жилийн дөрөв дэх гранд финалдаа тоглох эрхээ авлаа. Ямар санагдаж байна. 

-Мэдээж сайхан байна. Хүндхэн тоглолт боллоо. Би тоглолтыг бүрэн хянаж чадсангүй. Гэхдээ хянахыг хичээлээ. Хүнд тоглолтын эцэст хожсондоо баяртай байна.

-"Inferno" дээр бараг л хожигдох дөхсөн. Ямар асуудал гарсан бэ?

-Бид хоёр удаа хожих ёстой эко раундад ялагдсан. Мэдээж зарим чухал раундуудад сайн тоглоогүй. Эхний хагасын төгсгөлд муу хувилбар дуудчихлаа. Гэхдээ алдаагаа засч, хожсондоо баяртай байна.

-Цэнгэлдэхэд цугласан үзэгчид танай талд байсангүй. Үүнийг тоглож байхдаа анзаарав уу?

-Яагаад гэдгийг мэдэхгүй юм. Үнэндээ ийм зүйл төсөөлж байсангүй. Тэдэнд "The MongolZ" илүү таалагддаг юм шиг байна. Магадгүй тэд биднийг үзэн яддаг байх. Мэдэхгүй юм. Тоглолтод ирэхэд л, цэнгэлдэхэд орж ирэхэд л тэд биднийг бүүлж эхэлсэн. Хачин байсан шүү. Гэхдээ зүгээр ээ.

-Тоглолтын үеэр мэдэрсэн үү?

-Тийм ч их биш ээ. "The MongolZ"-ийг хожиж байхад тэд их орилж байсан. Бүүлэх нь бага зэрэг байсан. Жаахан гунигтай л юм. Гэхдээ зүгээр ээ.