Гишүүн, ажиглагч болон яриа хэлэлцээний түнш орнуудын хэвлэл мэдээллийн солилцоо, хамтын ажиллагааг дэмжих зорилготой ШХАБ-ын 2025 оны хэвлэл мэдээллийн хамтын ажиллагааны чуулга уулзалт Баасан гаригт (2025.05.23) Хятадын баруун хойд Шинжаан-Уйгарын өөртөө засах орны төв Өрөмч хотод эхэллээ. “Цэцэглэн хөгжсөн ирээдүйн төлөө хамтдаа илүү сайхан гал голомтыг бүтээцгээе” уриа дор болж буй уг форумд ШХАБ-ын гишүүн 26 улс, ажиглагч орон, яриа хэлэлцээний түнш орнуудын томоохон хэвлэл мэдээллийн хэрэгсэл, засгийн газрын агентлаг, эрдэм шинжилгээний байгууллага, аж ахуйн нэгжийн 300 төлөөлөгч оролцов. ШХАБ-ын орнуудын хэвлэл мэдээллийн байгууллагууд үнэн зөв, бодитой, шударга мэдээлэл өгөх замаар хамтын ажиллагааны зорилго, ач холбогдлыг ойлгуулах ёстой гэж оролцогчид санал нэгджээ. Мөн тус байгууллагын өсөлтөд зориулж олон нийтийн санаа бодлыг чиглүүлэх ёстой гэж үзсэн байна.

Түүнчлэн, форумд оролцогчдын дунд санал асуулга явуулахад 80 гаруй нь ШХАБ бол дэлхийн засаглалд эерэг үүрэг гүйцэтгэдэг гэж үзэж байна. Өөр 70 орчим хувь нь ШХАБ-ын тусламжтайгаар зарим улс орнууд дэлхийн засаглалд оролцох илүү их боломж, байр суурийг олж авсан гэж үзэж буйгаа илэрхийлсэн байна. Мөн 60 гаруй хувь нь ШХАБ нь улс орныхоо тогтвортой хөгжил, шинэчлэлд хувь нэмрээ оруулсан гэдэгтэй санал нэг байна. ШХАБ-ын ерөнхий нарийн бичгийн даргын орлогч, форумд оролцогч Сохайл Хан Пүрэв гаригт "Global Times" сонинд өгсөн онцлох ярилцлагадаа ШХАБ нь улс орнуудад янз бүрийн асуудлыг хэлэлцэх, энх тайван, хөгжил цэцэглэлтийг дэмжих өвөрмөц тавцан болж байна гэж үзэж буйгаа илэрхийлжээ. Тэрбээр хэлэхдээ, "ШХАБ нь улс орон бүрийн ашиг сонирхлыг харгалзан үзэж, хөгжлийн үр шимийг хүртэх эв нэгдэлтэй, аюулгүй, хүртээмжтэй хамтарсан, найрсаг орчныг бий болгоход чиглэгдэж байна. ШХАБ байгуулагдсан цагаасаа хойш бүс нутгийн хамтын ажиллагааны нэр хүндтэй, нөлөө бүхий индэр болсон" гэжээ.

Энэ жил ШХАБ-ын "Хятадын жил" юм. Судалгаанд хамрагдагсдын 90 гаруй хувь нь Хятадын хөгжил цэцэглэлтээс бусад улс орнууд жишээ авах ёстой гэж үзжээ. Мөн тус улстай хамтран ажиллах нь үндэсний хөгжилд үр өгөөжөө өгдөг гэж судалгаанд оролцогчид онцлон тэмдэглэсэн байна.