УИХ-ын гишүүн, Гадаад харилцааны сайд Б.Батцэцэг цаг үеийн асуудлаар мэдээлэл өглөө.

Гадаад харилцааны сайд Б.БАТЦЭЦЭГ:

-Тайландад болсон эмгэнэлтэй явдалд харамсч буй хүний хувьд А.Төмөр сайдтай холбогдсон. А.Төмөр сайд бол олон жил мэргэжлээрээ ажилласан хүн. Золгүй явдал болсон гэж өөрөө хэлсэн. Тайландын цагдаагийн байгууллагаас урьдчилсан дүгнэлт нь золгүй байдал гэсэн. Сэтгэл санааны хувьд хүн байгаа. Гурван хүүхэдтэй. Бага хүүхэд нь бие муутай. Гурван хүүхэд нь ээжийгээ алдсанд маш хүнд байгаа. Өөрөө ч ярьж чадахгүй байна лээ. Ийм үед энэ бүхнийг асуудал болгон дэвэргээд хувь хүний асуудлыг нь сошиалаар авч хэлэлцээд байгаа нь надад зохимжгүй байгаа. Сэтгүүлчид маань ч золгүй явдал болсон гэдгийг ойлгоосой. Цаг нь болохоор өөрөө талийгаачийн 49 хоногийн дараа мэдээлэл өгнө гэсэн. Хэргийн газар дээр тухайн үед нь очоод дүгнэлт гаргасан учир би өөрт нь итгэж байгаа. Хэвлэлээр ямар хүмүүс, ямар зорилготой, юу ярьж байгааг мэдэхгүй байна. Талийгаачийн ар гэрийнхэнд нь маш хүнд байгаа. Бид маш хүндэтгэлтэй хандах ёстой.

Элчин сайдын хувьд ирэх, буцах хугацаа гэж байдаггүй. Ажлын шаардлага, өөрийн хүсэлтийг нь үндэслэн нэг жилээр хугацааг нь сунгасан. Олон улсад ч тийм жишиг байдаг. Элчин сайдын ур чадвар, нэр хүндээс шалтгаалан 10-20 жил ч ажиллах тохиолдол байдаг.

-Хамтарсан Засгийн газар огцорч байгаатай холбогдуулан Ардчилсан намаас томилсон сайд, консул нарыг яах вэ?

-Би чинь улс төр дипломат албанд орох ёсгүй гэж үздэг хүн. Дөрвөн жил сайдаар ажиллахдаа өмнө нь томилогдсон, хууль бус гэх хүмүүсийн хугацааг нь дуусгаж, олон улсын жишигт нийцүүлэх гэж хичээсэн. Дэлхийд ийм жишиг байхгүй. Аль нэг нам хамтрахаар хэн хамаагүй хүмүүсийг явуулдаггүй. Манай улсад ч дандаа гадны улсын мэргэжилтнүүд ирдэг. Надад бол маш олон нэрс ирсэн. Намын дарга нарыг нь буруутгахгүй байгаа. Бүхий л салбарт хүний нөөцийн бодлого баримтлах нь зөв. Гэхдээ дипломат албанд улстөржилт байх ёсгүй. Монгол Улс нэгдмэл байх ёстой. Мэргэжлийн хүн, мэргэжлийн ур чадвар гэдэг нь байх ёстой. Үүнийг би эсэргүүцдэг. Хэвлэлээр гарсан нэрсийг томилсон гэж ойлгож болохгүй. Нэг ч хүн томилогдоогүй. Хамтарсан Засгийн газрын үед намын шугамаар томилогдсон хүн байхгүй. Судлагдсан хүмүүсийг ч шаардлага хангахгүй гэж буцаасан. Ерөнхий консуль, консуль дээр би хэлж байсан. Бусанд, Эрээнд, Манжуурт улс төрийн төлөөллийг нь харгалзсан явуулсан.

-МАН-аас бас хүмүүс томилсон шүү дээ?

-Хоёр элчин зөвлөх байгаа. Би олон удаа тайлбарласан. Засгийн газраас надад өгсөн үүргийн дагуу улс төрийн туршлагатай, мэдлэгтэй тухайн газраа ажиллаж, сурч байсан гэх хүсэлтийг нь үндэслэн томилсон.