НЭГ ДОРООС: Нийтийн тээврийн 53 чиглэлийг өөрчилнө

“Улаанбаатар марафон 2025” олон улсын гүйлтийн өдөр буюу тавдугаар сарын 24-нд амрах зах худалдааны төвүүд болон болон автозамын хөдөлгөөний зохицуулалт, энэ өдөр болох онцлох үйл ажиллагааны талаар мэдээллийг нэгтгэн хүргэж байна.

ДАРААХ БАЙРШЛУУДАД ЗАМ ХААНА

Маргааш буюу тавдугаар сарын 24-нд дараах байршилд 06:00-18:00 цаг хүртэл зам хаана. Тодруулбал,

Цэцэг төвийн уулзвар
Зоос гоёлын уулзвар
Сансарын имартын уулзвар
Бөхийн өргөөний уулзвар
Зүүн 4 замын уулзвар
Нарантуул захын уулзвар
Өгөөмөр захын уулзварын нүхэн гарц
Дүнжингаравын урд зам
Улиастайн уулзвар
Цэцэрлэгт хүрээлэнгийн дугуйн зам
Маршалын гүүрний хойд уулзвар
Хоум плаза
Гандигийн гудамж
Олимпийн гүүр
Гадаад хэргийн яамын уулзвар
Сүхбаатарын Талбай

Нийслэлийн биеийн тамир спортын газраас энэхүү арга хэмжээг зохион байгуулах бөгөөд иргэдийн аюулгүй байдлыг хангах хүрээнд цагдаагийн байгууллагаас дээрх хөдөлгөөний зохицуулалт хийхээр төлөвлөсөн байна.

Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн цагдаагийн хошууч Г.Отгонтамир “Цагдаагийн байгууллагаас жил бүр автомашингүй өдөр болон Улаанбаатар марафон арга хэмжээн дээр хөдөлгөөний аюулгүй байдал, олон нийтийн аюулгүй байдлыг хангах чиглэлээр ажилладаг. Энэ жилийн хувьд тавдугаар сарын 24-ний өдөр 06-18 цагийн хооронд тодорхой хэмжээний зам хааж, Улаанбаатар марафоныг зохион байгуулна. Хөдөлгөөний аюулгүй байдлыг хангах чиглэлээр тодорхой гудамж, замууд дээр хязгаарлалт тогтоосон байгаа. Замын хязгаарлалттай хэсэгт тээврийн хэрэгслээ үлдээхгүй байх, шаардлагатай тохиолдолд өмнөх өдөр нь тээврийн хэрэгслээ өөр газар байршуулж хөдөлгөөнд оролцох зэргээр Улаанбаатар марафон арга хэмжээнд саад болохгүй байхыг уриалж байна” гэв.

Мөн зам хаасан хэсэгт цахилгаан хөдөлгүүртэй мотоцикл, унадаг дугуйтай иргэд хөдөлгөөнд оролцож бага насны хүүхэд болон явган зорчигчийг мөргөж гэмтээх тохиолдол бүртгэгддэг. Тиймээс цагдаагийн байгууллагаас онцгойлон анхаарал хандуулж ажиллана. Тиймд, эцэг эхчүүд мөн бага насны хүүхдүүддээ хараа хяналттай байхыг зөвлөлөө.

ТОМООХОН ЗАХ, ХУДАЛДААНЫ ТӨВҮҮД АЖИЛЛАХГҮЙ

“Улаанбаатар марафон 2025” олон улсын гүйлтийн өдөр буюу тавдугаар сарын 24-нд дараах 20 зах, худалдааны төвүүд ажиллахгүй. Тухайлбал,

Алтжин бөмбөгөр
Нарантуул зах
Сандэй плаза
Шөнийн зах
Да хүрээ
Хархорин зах
Дүнжингарав худалдааны төв
100 айл орчиын барилгын материалын төвүүд ажиллахгүй.

УЛААНБААТАР МАРАФОН 2025”-ЫН ХӨТӨЛБӨР

Бямба гаригт дараах хөтөлбөрийн дагуу “Улаанбаатар марафон 2025” арга хэмжээг зохион байгуулна.

НИЙТИЙН ТЭЭВРИЙН ЧИГЛЭЛД ӨӨРЧЛӨЛТ ОРУУЛНА

Нийслэлийн нийтийн тээврийн бодлогын газрын Тээврийн бодлого судалгааны хэлтсийн ахлах мэргэжилтэн О.Хонгорзулын мэдээлснээр “Нийтийн тээврийн бодлогын газраас Улаанбаатар марафон 2025 олон улсын гүйлт зохион байгуулахтай холбоотойгоор нийт 53 чиглэлийн 483 маршрутад өөрчлөлт оруулахаар төлөвлөсөн. Үүнд,

Энхтайваны өргөн чөлөө, нарны замаар үйлчилдэг чиглэлүүд Их тойруугаар үйлчилгээ үзүүлнэ.
Урдаас хойш чиглэлийн чиглэлд үйлчилгээ үзүүлдэг чиглэлүүд Ногоон нуур, Цагдаагийн гудамжаар үйлчилгээ үзүүлнэ.
Хойноос урагш чиглэлд үйлчилгээ үзүүлдэг тээврийн хэрэгслүүд 120 мянгат, Нарны гүүр, Баянбүрдийн тойрог гэсэн ерөнхий маршрутын дагуу үйлчилгээ үзүүлэх юм.
Мөн марафоны турш хаагдаж буй гудамж, замуудыг 100 хувь дайран өнгөрдөг 3 чиглэлийн тээврийн хэрэгсэл түр зогсоно.

Уралдаан дууссаны дараа нийтийн тээврийн үйлчилгээ үндсэн маршрутаараа үйлчилгээ үзүүлнэ” гэв.

ЭРҮҮЛ МЭНДИЙН ТУСЛАМЖЫН БАГ АЖИЛЛАНА

НЭМГ-ын Эрүүл мэндийг дэмжих, халдварт бус өвчний хэлтсийн дарга Д.Цэнд-Аюушаас тодруулснаар “Улаанбаатар марафон 2025 олон улсын гүйлтэд НЭМГ-аас эмнэлгийн тусламж үйлчилгээ үзүүлэх суурин 6 баг болон явуулын 4 баг буюу нийт 10 баг ажиллана. Мөн хоолны хордлогот халдвараас урьдчилан сэргийлж, хяналт тавихаар 11 улсын байцаагч ажиллахаар бэлтгэл ажлыг хангаад байна” гэлээ.

Мөн дараах зөвлөмжийг хүргэж байна.

Бүтэн марафон нь 42190 метр, хагас марафон нь 21095 метр тул зөвхөн энэ гүйлтээр хичээллэдэг хүмүүс тухайн зайд уралдвал зохино.
Зүрх судас, уушгины архаг өвчтэй болон халуурах, бөөлжих, шингэн алдах, даралт ихсэх, цээж хөндийрөх зэрэг зовуурьтай, жингийн илүүдэлтэй, жингийн дутагдалтай, өндөр настан болон 18-аас доош насныхан эрүүл мэндийн талаас гарч болох эрсдэлээс урьдчилан сэргийлэх зорилгоор холын зайд гүйхгүй байх.
Эрсдэл үүсэхээс сэргийлэх зорилгоор спортын болон өрхийн эрүүл мэндийн эмчээс зөвлөгөө авах.
Марафон гүйлтийн өмнөх өдөр сайн унтаж амрах.
Махан хоол хүнсний ногоог аль болох бага хэрэглэх.
Хөнгөн, нүүрс ус, илчлэг ихтэй хоолыг түлхүү хэрэглэх.
48 цагийн өмнөөс усыг бага багаар уух.
Марафоны өмнөх өдөр архи, согтууруулах ундаа хэрэглэхгүй байх.
Цаг агаарын нөхцөлтэй уялдуулж хувцсаа сонгох.
Хөлс сайн нэвтрүүлэх материалтай зориулалтын хувцас өмсөх хэрэгтэй.

УЛААНБААТАР МАРАФОН 2025”-ЫН МАРШРУТ