Түгжрэлийг бууруулах ажлын хүрээнд их багтаамжтай, байгальд ээлтэй нийтийн тээврийг хөгжүүлэх зорилт тавьсны нэг томоохон төсөл нь хөнгөн галт тэрэг буюу LRT “Трамвай”. 

Хөнгөн галт тэрэг LRT “Трамвай” төслийн I шугамыг "Зунжин" худалдааны төвөөс Сүхбаатарын талбай чиглэлд 11 км урттай 12 өртөөтэй байхаар, II шугамыг "Буянт-Ухаа" цогцолбороос "Торгоны зам" цогцолбор, 120 мянгатын уулзвараас Сүхбаатарын талбай чиглэлд 15 км урттай 22 өртөөтэй байхаар төлөвлөсөн. Хөнгөн галт тэрэг LRT “Трамвай” төслийн техник эдийн засгийн үндэслэл, зураг төслийг боловсруулах ажлыг одоогийн байдлаар хийж байна гэдгийг НИТХ-ын Ээлжит бус VI хуралдаанд Төсөл хэрэгжүүлэх нэгжээс танилцууллаа. 

Хөнгөн галт тэрэг LRT “Трамвай” төслийн бүтээн байгуулалтын ажлын гүйцэтгэгчийг сонгон шалгаруулж, гэрээ байгуулах ажлыг энэ улиралд багтаан хэрэгжүүлэхээр төлөвлөсөн байна.

EPC гүйцэтгэгчийг шалгаруулан гэрээ байгуулж, бэлтгэл ажлыг хангуулахаар ажиллаж байгаа бөгөөд уг төслийг 2024- 2031 он хүртэл хэрэгжүүлж дуусгах хугацаатайг онцоллоо.

Хөнгөн галт тэрэг LRT “Трамвай” төсөл хэрэгжүүлснээр өдөрт 15-25 мянган зорчигч тээвэрлэнэ. Ингэснээр авто замын хөдөлгөөний нэвтрүүлэх чадварыг 25,7 хувиар нэмэгдүүлнэ гэж тооцож байгаа аж. 

Энэ онд уг төсөлтэй холбоотой байгаль орчны төлөв байдлын суурь судалгааг хийж, холбогдох зөвлөмж гаргах, төслийн концепц зураг болон трассын чиглэлийг боловсруулан баталгаажуулах, төслийн эдийн засгийн үндэслэл болон бусад нарийвчилсан төлөвлөлтөд шаардлагатай тооцооллыг хийж дуусгах гэнэ. Үүний дараагаар ТЭЗҮ-ийг боловсруулах зөвлөх багийг сонгон шалгаруулж, зөвлөмжийн дагуу ажлын зураг төсөл, техникийн баримт бичгийг бүрдүүлэн, ТЭЗҮ болон замын трассын магадлагааг хүлээн авч, баталгаажуулах ажлыг 2025 оны III улиралд багтаан хэрэгжүүлэхээр байгааг Сэлбэ 20 минутын хот корпорацийн гүйцэтгэх захирал У.Баатар хэллээ. 

Төслийн барилга угсралтын ажлыг 2027 оны I улиралд эхлүүлэх бэлтгэл хангана. Түүнчлэн, трамвайтай холбоотой техникийн стандарт, дүрэм, зохицуулалт, орчны төлөвлөлт зэрэг нарийвчилсан баримт бичгийг боловсруулж, Тээврийн төслийн хэрэгжилтийн үе шаттай уялдуулан III–IV улиралд багтаан бүрэн дуусгах зорилт тавьжээ. 

Улаанбаатар хотод их багтаамжийн нийтийн тээврийн хэрэгсэл “Метро” төслийн бүтээн байгуулалтын ажлын гүйцэтгэгчийг сонгон шалгаруулж, гэрээ байгуулах ажлыг энэ оны II улиралд багтаан хэрэгжүүлэхээс гадна төслийн барилгын ажлыг эхлүүлэх бэлтгэлийг хангах төлөвлөгөөтэй.

Төслийн барилгын ажлыг эхлүүлэхэд ажиллах боловсон хүчний бэрхшээл манайд бий болох нь гарцаагүй бөгөөд Метро төслийн хүрээнд инженер, мэргэжилтэн бэлтгэх “2+2” хөтөлбөрийг Нийслэлийн Засаг даргын Тамгын газар, Шинжлэх Ухаан Технологийн их сургууль, “Духуа инженеринг” компани хамтран хэрэгжүүлэхээр болсон. Шинжлэх Ухаан Технологийн их сургууль, БНСУ-ын Халла их сургуульд тус бүр хоёр жилийн хугацаатай оюутнуудыг сургаж, эхний ээлжинд 200 инженер бэлтгэнэ. Метро төслийн хүрээнд дараах шийдвэрлэх шаардлагатай тулгамдаж буй асуудал байгааг НИТХ-ын Ээлжит бус VI  хуралдаанд Сэлбэ хот орон сууцжуулалтын төслийн захирал У.Баатар танилцууллаа.

Тэрбээр, нийтийн тээврийн чиглэлд метро, трамвай, тусгай замын автобус, дүүжин замын тээвэр, хөнгөн болон салбар төмөр замын зургаан төсөл хэрэгжиж байна.

Мөн Авто зам, гүүр, уулзварын төслүүдийн хүрээнд Шинэ тойрог зам, Туулын хурдны зам, Өөдөө тэмүүлэх гүүр, Олон түвшний уулзварын төслүүд багтсан.  

Хот байгуулалт, орон сууцны чиглэлд Сэлбэ хот, Баянхошуу, Ханын материал орчим, Хүннү хот зэрэг томоохон төсөл хэрэгжих бол Эрчим хүчний төслүүдийн хүрээнд ДЦС-5, дулааны тархмал эх үүсвэр, хог болон лаг шатаах үйлдвэр, Баруун далай нүүрсний ордыг түшиглэсэн цахилгаан станцын төслүүд. Мөн Дэд бүтэц, усны менежментийн төслүүд хэрэгжүүлэхээр төлөвлөөд байна. Эдгээр төслийг хэрэгжүүлэхэд,

• Санхүүжилт шийдвэрлэх;
• Газар чөлөөлөлт
• Хууль, эрх зүйн орчин;
• Норм, стандарт нутагшуулах;
• Галт тэрэгний удирдлагын системд ашиглах LTE-R Сүлжээний 700МHz давтамжийн зурвасд Дээд түвшинд 10МHz, Доод түвшинд 10МHz зурвасыг чөлөөлөх шаардлагатай гэлээ.

Нийслэл Улаанбаатар хотод хэрэгжих 24 мега төслийн явц, тулгамдаж буй асуудлын талаар НИТХ-ын Төлөөлөгч, Нийслэлийн Автозамын түгжрэлийг бууруулах төсөл, хөтөлбөрийн зохицуулагч Д.Бадарсан танилцуулж, төлөөлөгч нарын асуултад хариулт өглөө. 

Их багтаамжийн нийтийн тээврийн хэрэгсэл “Метро”-г барих төслийн зөвлөх үйлчилгээний гүйцэтгэгчээр БНСУ-ын Dohwa Engineering Co.Ltd-ын ахалсан түншлэл шалгарч, 2024 оны 07 дугаар сарын 05-ны өдөр “Улаанбаатар метро” төслийн зөвлөх үйлчилгээний гэрээг байгуулсан. 

Улаанбаатар метро төсөл нь Толгойтоос Амгалан чиглэлд 19.4 км урт шугамтай, 15 өртөө, засвар үйлчилгээний депотой байх юм. 

Төсөл хэрэгжсэнээр оргил цагт нэг чиглэлд цагт 17,200-26,000 хүн тээвэрлэх бөгөөд авто замын сүлжээний хөдөлгөөний эрчим 10 хувиар сайжирч, дундаж хурд 18 орчим хувиар өсөх юм. 

Мөн тээврийн хэрэгслээс ялгарах агаарын бохирдлыг бууруулахад эерэг нөлөөлөл үзүүлэх бөгөөд нийгмийн хувьд автобусаар 45 минутад явах зайг метрогоор 15 минутад туулах нөхцөл бүрдэх юм. Төслийг хэрэгжүүлэх үед дотоодын 700 ажлын байр, ашиглалтад орох үед 745 байнгын ажлын байр үүсэх урьдчилсан тооцоо гарсан гэв.