Монгол Улсын 33 дахь Ерөнхий сайдад горилж буй улстөрчдийн АТГ-т мэдүүлсэн Хөрөнгө орлогын мэдүүлгийг танилцуулъя.

Д.АМАРБАЯСГАЛАН

УИХ-д анх удаа сонгогдсон ч улс төрийн замналын хувьд тэрбээр Л.Оюун-Эрдэнээс ч туршлагатай. Дөрвөн даргын гал тогоог барьж, МАН-д олон жил генсек хийсэн түүнд муу сайн түүх, туршлага ч их. Тэрбээр 2016 оны долдугаар сарын 6-нд анх НИТХ-ын төлөөлөгч томилогдсон бөгөөд 2019-2023 онд АТГ-т хөрөнгө орлогоо мэдүүлжээ.

Түүний жилийн нийт орлого нь 2019 онд 71 сая төгрөг байсан бол 2023 онд 260 сая төгрөг болж өсчээ. Тэгвэл гэр бүлийн нийт гишүүдийн орлого нь 2023 онд 64 сая төгрөг гэж мэдүүлсэн байна.

Харин хоёр нийтийн орон сууцтай, үйлдвэрлэлийн зориулалтын нэг барилгатай, гурван авто зогсоолтой бөгөөд нийт 5.9 тэрбум төгрөгийн үнэтэй ажээ. Мөн нэг суудлын жижиг автомашин, "Mercedes Benz-S400" маркийн нэг автомашинаа нийтэд нь 120 сая төгрөгөөр үнэлжээ. Мөн тэрбээр 120 адуугаа 321 сая төгрөгөөр үнэлсэн бол эзэмших эрхтэй нэг газраа 5 сая төгрөгөөр үнэлсэн байна. Үүнээс гадна 230 сая төгрөгийн үнэт эдлэлтэй. Мөн дотоодын банкинд 276 сая төгрөгийн хадгаламжтай бол авлага нь 528 сая төгрөг гэж хөрөнгө орлогын мэдүүлэгтээ мэдүүлснээс хойш хоёр жил өнгөрчээ. Тэрбээр "Шинэ талст" ХХК, "Севен три студи" ХХК, "Голомт банк" ХХК-нд хөрөнгө оруулалт хийсэн байна.

Н.УЧРАЛ

Аль эртнээс л дараагийн Ерөнхий сайд гэж нэр нь сэвэгдэж ирсэн. У.Хүрэлсүхийн бас нэг хуурай дүү. Түүнийг улс төрд хөл оруулсан хүн бол мэдээж Ерөнхийлөгч. Тиймээс Ерөнхийлөгчийн улс төр явж байна гэж харвал ЗГХЭГ-ийн даргаас Засгийн газрын тэргүүн болж дэвших боломжтой кандитатаар нэрлэгдэж байна. Тэрбээр 2016 оны долдугаар сарын 5-нд анх УИХ-ын гишүүнээр сонгогдсон бөгөөд 2019-2023 онд буюу сүүлийн таван жилийн хугацаанд АТГ-т хөрөнгө орлогоо мэдүүлжээ.

Түүний жилийн нийт орлого нь 2019 онд 222 сая төгрөг байсан бол 2023 онд 700 сая төгрөг болж өсчээ. Тэгвэл гэр бүлийн нийт гишүүдийн орлого нь 2023 онд 58 сая төгрөг гэж мэдүүлсэн байна.

Харин гурван нийтийн орон сууцтай, үйлдвэрлэлийн зориулалтын нэг барилгатай, хоёр зуслангийн байшин нь 3.5 тэрбум төгрөгийн үнэтэй ажээ. Мөн "Mercedes Benz-G 500", "Lexus-570", "Nissan Tiida", "Mercedes Benz-S400" маркийн дөрвөн автомашинаа 965 сая төгрөгөөр үнэлжээ. Мөн тэрбээр 180 хонь, 20 адуугаа 31 сая төгрөгөөр үнэлсэн бол эзэмших эрхтэй нэг газраа 150 сая төгрөгөөр үнэлсэн байна. Үүнээс гадна 85 сая төгрөгийн үнэт эдлэлтэй. Мөн дотоодын банкинд  2 тэрбум төгрөгийн хадгаламжтай гэж хөрөнгө орлогын мэдүүлэгтээ мэдүүлснээс хойш хоёр жил өнгөрчээ. Тэрбээр "Гоц жаалууд цэцэрлэг" ХХК, "Рояал Академи" ХХК, "Грийн Ланд групп" ХХК, "Массив трейд" ХХК, "Их Засаг" олон улсын их сургууль ХХК хөрөнгө оруулалт хийсэн байна.

С.АМАРСАЙХАН

Тэрбээр 2019 оны хоёрдугаар сарын 7-нд анх хотын дарга болсон бөгөөд сүүлийн дөрвөн жилийн хугацаанд Шадар сайдын албан тушаалаар АТГ-т хөрөнгө орлогоо мэдүүлжээ.

Түүний жилийн нийт орлого нь 2019 онд 83 сая төгрөг байсан бол 2023 онд 81 сая төгрөг болж буурчээ. Тэгвэл гэр бүлийн нийт гишүүдийн орлого нь 2023 онд 205 сая төгрөг гэж мэдүүлсэн байна.

Харин дөрвөн нийтийн орон сууцтай бөгөөд 10 тэрбум төгрөгийн үнэтэй ажээ. Мөн "Lexus RX 350" маркийн автомашинаа 107 сая төгрөгөөр үнэлжээ. Мөн тэрбээр малгүй, газаргүй бөгөөд 225 сая төгрөгийн үнэт эдлэлтэй. Мөн дотоодын банкинд 303 сая төгрөгийн хадгаламжтай бол 41 сая төгрөгийн зээлтэй гэж хөрөнгө орлогын мэдүүлэгтээ мэдүүлснээс хойш хоёр жил өнгөрчээ. Тэрбээр "Оюуны ундраа групп" ХХК, "Монголын санхүүгийн групп" ББСБ, "Диадэм" ХХК-нд хөрөнгө оруулалт хийсэн байна.

Б.ЖАВХЛАН

Тэрбээр 2016 оны долдугаар сарын 5-нд анх УИХ-ын гишүүнээр сонгогдсон бөгөөд сүүлийн гурван жилийн хугацаанд Сангийн сайдын албан тушаалаар АТГ-т хөрөнгө орлогоо мэдүүлжээ.

Түүний жилийн нийт орлого нь 2019 онд 26 сая төгрөг байсан бол 2023 онд 65 сая төгрөг болж өсчээ. Тэгвэл гэр бүлийн нийт гишүүдийн орлого нь 2023 онд 63 сая төгрөг гэж мэдүүлсэн байна.

Харин нэг нийтийн орон сууцтай бөгөөд 1.3 тэрбум төгрөгийн үнэтэй ажээ. Мөн "Toyota, LEXUS RX330" маркийн автомашинаа 194 сая төгрөгөөр үнэлжээ. Мөн тэрбээр 70 адуу, 75 хурдан удмын адуу, 70 үхрээ 668 сая төгрөгөөр үнэлсэн байна. Үүнээс гадна 70 сая төгрөгийн үнэт эдлэлтэй. Мөн дотоодын банкинд 18 сая төгрөгийн хадгаламжтай бол 123 сая төгрөгийн зээлтэй гэж хөрөнгө орлогын мэдүүлэгтээ мэдүүлснээс хойш хоёр жил өнгөрчээ. Тэрбээр "Дархан мэдээлэл төв" ХХК-нд хөрөнгө оруулалт хийсэн байна.

Я.СОДБААТАР

У.Хүрэлсүхийн дэргэд удаан шадарлаж байгаа хүн. Бараг баруун гар нь гэж хэлж болно. Тэрбээр 2012 оны долдугаар сарын 6-нд анх УИХ-ын гишүүнээр сонгогдсон бөгөөд сүүлийн гурван жилийн хугацаанд ЕТГ-ын даргын албан тушаалаар АТГ-т хөрөнгө орлогоо мэдүүлжээ.

Түүний жилийн нийт орлого нь 2019 онд 35 сая төгрөг байсан бол 2023 онд 100 сая төгрөг болж өсчээ. Тэгвэл гэр бүлийн нийт гишүүдийн орлого нь 2023 онд 257 сая төгрөг гэж мэдүүлсэн байна.

Харин хоёр нийтийн орон сууцтай, нэг зуслангийн байшинтай бөгөөд 433 сая төгрөгийн үнэтэй ажээ. Мөн автомашингүй тэрбээр 49 адуугаа 30 сая төгрөгөөр үнэлсэн бол эзэмших эрхтэй нэг газраа 20 сая төгрөгөөр үнэлсэн байна. Харин дотоодын банкинд 32 сая төгрөгийн хадгаламжтай гэж хөрөнгө орлогын мэдүүлэгтээ мэдүүлснээс хойш хоёр жил өнгөрчээ. Тэрбээр "Ти-Эс-Эм" ХХК, "Эрдэнэс МГЛ" ХК, "Эрдэнэс Таван толгой" ХК-нд хөрөнгө оруулалт хийсэн байна.