Нийслэлийн Хан-Уул дүүргийн наймдугаар хороо Сонсголонгийн гүүрний урд замд энэ оны тавдугаар сарын 22-ны өдрийн 08.00 цагийн үед 37 настай Б нь нэр бүхий компанийн эзэмшлийн "Volvo" маркийн тээврийн хэрэгслийг жолоодон явахдаа явган хүний замаар зорчиж авто замын хайс эвдсэн асуудлыг шалган, зөрчилд холбогдогч компанийг Монгол улсын Зөрчлийн тухай хуулийн 14.4 дүгээр зүйлийн 1 дэх хэсэгт заасны дагуу 3000 нэгжтэй тэнцэх хэмжээний төгрөгөөр торгох шийтгэл оногдуулж, явган хүний зам, хайс эвдсэн хохирлыг барагдуулсан. Мөн эвдэрсэн хайс, явганы замыг нийслэлийн Замын хөгжлийн газраас засварлаж хэвийн байдалд эргэн оруулаад байна.

Авто замын хашлага мөргөж, эвдсэн ачааны тээврийн хэрэгслийн жолоочийг олж, тогтоон шалгалтын ажиллагаа явуулж байгаа талаар Тээврийн цагдаагийн албанаас мэдээллээ. Тодруулбал, өнөөдөр /2025.05.22/ 08.00 цагийн үед нийслэлийн Хан-Уул дүүргийн наймдугаар хороо, Сонсголонгийн гүүрний урд замд ачааны тээврийн хэрэгсэл авто замын барилга байгууламж буюу хашлага мөргөн, эвдрэл учруулж байгаа бичлэг олон нийтийн сүлжээнд тавигдсан.

Ослын газарт нөхөн үзлэг хийж, хариуцлагын арга хэмжээг тогтоох шалгалт үргэлжилж байна. Нийслэлийн хэмжээнд тээврийн хэрэгсэл, ялангуяа том оврын тээврийн хэрэгсэл авто замын эд ангиудыг эвдэх зөрчил нэмэгдэж байгаа учраас жолооч та бүхэн авто замын эд ангид гамтай хандаж, замын хөдөлгөөнд соёлтой оролцохыг анхаарууллаа.