АНУ-ын Даллас хотноо "IEM Dallas" тэмцээн үргэлжилж байна. 300 мянган ам.долларын шагналын сантай тус тэмцээнд дэлхийн шилдэг 16 баг өрсөлдөж байгаа бөгөөд Азийн чансааг тэргүүлэгч гэдэг утгаараа Монголын "The MongolZ" оролцож байна.

Тэд өнөөдөр/2025.05.22/ хэсгийн аваргын төлөө Францын "Vitality" багтай тоглож, ширүүхэн өрсөлдөөний эцэст 1-2 гэсэн харьцаатай тахим буулгалаа. Эхний "Inferno" мап дээр "Vitality" ялсан бол удаах "Nuke" дээр "The MongolZ" илүүрхэж, шийдвэрлэх "Mirage" дээр ширүүн, ойрхон өрсөлдөөний эцэст Францын баг яллав.

"Vitality" шууд хагас шигшээд шалгарсан бол "The MongolZ" хагас шигшээд шалгарахын төлөө "Aurora Gaming" багтай тоглоно.

Дэлхийн чансааг тэргүүлэгч Францын баг энэ жил дийлдэшгүй байгаа. "Vitality"-ийн хожлын цуврал 28-д хүрч, бүх цаг үеийн хоёрдугаарт явж байна. Францын баг өмнө нь Бразилын "Legacy", Германы "GamerLegion" багуудыг буулган авчээ.

Өнөөгийн "CS2"-ийн ертөнцөд "Vitality"-г буулган авах баг олдохгүй байна. Хамгийн дөхүүлсэн нь "Falcons" болон "The MongolZ" боллоо.

Дэлхийн чансааны топ арав дотор "The MongolZ"-ийн хожиж үзээгүй цор ганц баг нь "Vitality" гэхэд буруудахгүй. Хоёр баг сүүлийн 12 сарын хугацаанд зургаан удаа учраа таарахад бүгдэд нь "Vitality" ялаад байна.