МАН-ын Бага хурал шөнөжин хуралдаж, эцэст нь гэрээгээ зөрчсөн үндэслэлээр улс төрийн намыг хамтарсан Засгийн газрын бүрэлдэхүүнээс гаргахаар шийдвэрлэлээ. 

Энэ талаар МАН-ын ерөнхий нарийн бичгийн дарга Я.Содбаатар "Засгийн газрын бүрэлдэхүүнд орж ажиллаж байгаа УИХ дахь намын бүлгийн нэр бүхий гишүүд хамтарч ажиллах гэрээгээ удаа дараа зөрчсөн тул оролцуулахгүйгээр Засгийн газрыг бүрдүүлж 2024 оны сонгуульд нэр дэвшүүлсэн мөрийн хөтөлбөрийг хэрэгжүүлэх нь зүйтэй гэж Бага хурлын гишүүд шийдвэрлэлээ. Бага хурлын гишүүд олонхиороо энэ шийдвэрийг гаргасан тул хамтарч ажиллаж байгаа улс төрийн намуудад энэ тухай танилцуулж, хамтарсан Засгийн газрын гэрээнд заасны дагуу Бодлогын зөвлөлд танилцуулж дараагийн алхмыг хийх болно" гэлээ. 

НЭМЭЛТ: 

МАН-ын Бага хурал түр завсарлаад байна. Бага хуралд оролцсон гишүүдээс тус хурлаар хэлэлцсэн асуудлын талаар тодруулахад "Хамтарсан Засгийн газар үргэлжлүүлэн ажиллах ёстой" гэх санал 50 хувийг эзэлж байна. Гэхдээ голчлон хамтарсан Засгийн газарт багтаж ажиллаж байгаа Ардчилсан намын талаар түлхүү асуудал хөндөгдлөө. Ардчилсан нам нь Засгийн газарт хамтарч байж, сөрөг хүчин шиг ажиллаж байна. Тиймээс Засгийн газраас гаргавал яасан юм бэ" гэдэг саналыг гишүүд олноор хэлсэн талаар тус намын гишүүд хэлж байна. 

Бага хурлын гишүүд саналаа хэлж дууссаны дараа хамтарсан Засгийн газрыг үргэлжлүүлэн ажиллуулах уу, эсвэл сэлгээ хийх үү гэдэг асуудал дээр нууц санал хураалт явуулах аж. 

Б.Дэлгэрсайхан: Сайд нарыг явуулах талаар огт яригдаагүй

НЭМЭЛТ:

МАН-ын Бага хурал хаалттай горимоор энэ цаг мөчид үргэлжилж байна. УИХ-ын гишүүн, Зам тээврийн сайд Б.Дэлгэрсайханыг Бага хурлаас гарч ирсэн даруйд сэтгүүлчид хурлын талаар тодруулахад “Хурал тайван амгалан уур амьсгал дунд болж байна. МАН-ын дарга, Ерөнхий сайд Л.Оюун-Эрдэнэ, УИХ-ын дарга Д.Амарбаясгалан нараас гишүүд асуулт асуусан. Хариулт хараахан өгөөгүй байна” гэлээ.

Мөн сэтгүүлчид “Ерөнхий сайдтай хамтарч нэг баг болж ажиллаж чадахгүй байгаа сайд нарыг явуулах тухай яригдсан мэдээлэл байна. Үнэн үү” гэхэд “Энэ асуудал огт яригдаагүй” гэж тодотголоо.

Ерөнхий сайд гишүүдийн асуултад хариулт өгч байна

МАН-ын VI Бага хуралд МАН-ын дарга, Ерөнхий сайд Л.Оюун-Эрдэнэ хийх ажлынхаа талаар илтгэл тавьсны дараа гишүүд асуулт тавьж, хариулт авч буй юм байна. Хуралдаан хаалттай үргэлжилж байна. 

Мөн энэ үеэр МАН-ын гишүүд Ерөнхий сайд Л.Оюун-Эрдэнэд хандаж "Ардчилсан намын Женко Х.Баттулгаас салах ёстой" гэх байр суурийг илэрхийлжээ. 

МАН-ын Бага хурлын VI хуралдааны даргаар Удирдах зөвлөлийн гишүүн, УИХ дахь МАН-ын бүлгийн дарга Л.Мөнхбаатар, дэд даргаар Удирдах зөвлөлийн гишүүн Б.Оюунбилэг нарыг сонгосон байна.

МАН-ын Бага хурал эхэлсэн байна. Бага хурлын 369 гишүүнээс 240 нь буюу 67 хувь нь ирснээр хурлыг эхлүүлжээ. Уг хуралдааны эхэнд МАН-ын дарга, Ерөнхий сайд Л.Оюун-Эрдэнэ улс төрийн итгэл тавьж буй аж.

Тус хурлаар хамтарсан Засгийн газрыг цаашид үргэлжлүүлэн ажиллуулах уу, эсвэл дангаараа Засгийн газар ажиллах ёстой гэж үзэх үү. Мөн Ерөнхий сайд Л.Оюун-Эрдэнэд итгэл үзүүлэх үү, үгүй юу гээд асуудлуудыг хэлэлцэх юм. Иймээс МАН-ын Бага хурлаас гарах шийдвэрийг хамтарсан Засгийн газарт багтсан Ардчилсан нам, ХҮН нам мөн чих тавин хүлээж байна. 

МАН-ын Бага хурал өнөөдөр 15.00 цагт товлогдсон ч одоогоор эхлээгүй байна. Бага хуралдаа оролцохоор гишүүд нь Тусгаар тогтнолын ордонд ирсээр байна. УИХ дахь МАН-ын бүлгийн гишүүд, Засгийн газрын гишүүд "Хамтарсан Засгийн газар үргэлжлүүлэн ажиллах ёстой" гэх байр суурийг түлхүү илэрхийлж байгаа бол Бага хурлын зарим гишүүн "МАН дангаараа Засгийн газраа байгуулан ажиллах нь зөв юм" гэдэг байр суурийг илэрхийлж буй юм. 

Сануулахад, МАН-ын Бага хурал 300 гаруй гишүүнтэй. Ирц 50 хувийн босго давж байж хурал эхлэх учиртай. 

МАН-ын Бага хурал өнөөдөр /2025.05.21/ 15:00 цагт зарлагдсан бөгөөд Тусгаар тогтнолын ордонд хүралдах юм. Бага хурлын өмнө МАН-ын Удирдах зөвлөл хуралдах ёстой. Тус хуралдаануудаар МАН хамтарсан Засгийн газрын асуудлыг хэлэлцэнэ.  Тодруулж хэлбэл, УИХ дахь МАН-ын бүлгийн хуралдаан өнгөрсөн Даваа гаригт хуралдахад Ерөнхий сайд Л.Оюун-Эрдэнэ хүүтэй нь холбоотой үүссэн асуудлаар гишүүдэд мэдээлэл өгсөн байдаг. Улмаар хамтарсан Засгийн газарт итгэл үзүүлэх эсэх асуудлаар Бага хурлын гишүүдийнхээ саналыг сонсъё гэдэг санал гаргасан. Энэхүү саналыг нь бүлгийн гишүүд дэмжсэн. Гэхдээ МАН-ын бүлгийн гишүүд дунд Ерөнхий сайдын хүүтэй холбоотой үүссэн асуудлыг намын зовлон болгох нь зохисгүй. Ерөнхий сайд ёс зүйн хариуцлага хүлээх ёстой" гэх байр суурьтай гишүүд бас бий. Харин Бага хуралд оролцохоор ирж байгаа гишүүдийн хувьд "Хэрвээ МАН дангаараа Засгийн газраа байгуулан ажиллах болбол маш хүнд замыг туулах болно" гэдэг байр суурийг ч илэрхийлээд байна.