Ерөнхий сайд Л.Оюун-Эрдэнэ өнөөдөр /2025.05.21/ Нийтийн албан тушаалтны хууль бус хөрөнгийг иргэний журмаар нэхэмжлэх, нөхөн төлүүлэх тухай хуулийн төслийг УИХ-ын дарга Д.Амарбаясгаланд өргөн барив.

Дээрх хуулийн төслийг өргөн мэдүүлэх үеэрээ Ерөнхий сайд Л.Оюун-Эрдэнэ "Монгол Улсын Засгийн газраас нийтийн албан тушаалтны хууль бус хөрөнгийг иргэний журмаар нэхэмжлэх, нөхөн төлүүлэх хуулийн төслийг УИХ-ын даргад өргөн барьж байна. Тус хуулийг өмнө нь арваннэгдүгээр сард өргөн барьсан. Үүнийг УИХ-ын дүгнэлт дээр үндэслэж зарим зүйл заалтыг илүү боловсронгуй болгосон. Ялангуяа Сингапур, Шинэ Зеланд зэрэг улсын жишгээр хүн орлогоо нотолж чадахгүй бол улсын орлого болдог. Энэ нь нийтийн албан тушаалтанд хамаарна. Ингэхдээ гэр бүлийн гишүүдийн орлогын албан татвараар нарийвчилж хянана” гэлээ.

Тус хуулийн зорилго нь шударга ёсыг хангах, нийтийн албан тушаалтны гэмт хэргийг бууруулах, төсвийн хөрөнгө болон нийгмийн ашиг сонирхлыг хамгаалах, хураан авсан хөрөнгийг нийгмийн сайн сайхны төлөө зарцуулах боломж бүрдүүлэх юм. Нийтийн албан тушаалтны хууль бус хөрөнгийг иргэний журмаар нэхэмжлэх, нөхөн төлүүлэх эрх зүйн зохицуулалт нь нийгмийн шударга ёсыг хангахад онцгой ач холбогдолтой бөгөөд хуулийн төсөл батлагдсанаар авлигын эсрэг хууль тогтоомж боловсронгуй, тодорхой болж, нийгэм, эдийн засаг, хууль зүйн олон эерэг үр дүн үзүүлнэ гэж үзэж байгаа ажээ.